Vawi hnih Formula One world champion lo ni tawh Spanish driver Fernando Alonso chuan season tawpruala F1 a chawlhsan tur thu a lo sawi tawh a, a chawlhsan chhan hi a theih tawh loh vang ni lovin, chawlh a duh tawh vang niin a sawi.

Kum 37 mi chuan, “Ka theih tawh loh avanga chawl tur ka ni lova, ka duh avanga chawl tur ka ni zawk. F1-ah hian ka ngaihtuah phak bakin ka hlawhtling tawh a, chuvang chuan chawlh hi ka duh tawh. Tunah chuan F1 pawn lama hlawhtling a ngai tawh a ni,” a ti.

Spanish mi tho, Alonso-a thianpa Carlos Sainz chuan McLaren driver Alonso hi a thlak dawn a, Sainz chuan, “Alonso a chawl tawh tur hi Formula 1 tan chuan channa nasa tak a ni ngei dawn a, driver tha ber zinga mi a nih loh pawhin driver tha ber a ni a, a chawl tawh tur hi channa ropui tak a ni,” a ti.

Alonso hian kum 2001 atang khan F1 luhchilhin, Minardi tan a tlan phawt a, hemi hnu hian Renault-ah a insuan. Renault-a a awm lai hian kum 2005 leh kum 2006-ahte Formula One World Drivers’ Champion nihna a lo chelh tawha, mi tam takin Spanish driver hi khawvela F1 driver tha berah an ngai hial.

Kum 2007-ah Mclaren-ah lutin, hemi hnu kum hnih chhung hi Renault tan a inlan leh. Kum nga chhung Ferrari tan tlainin, tunah hian McLaren-ah a awm leh mek a ni.