Ka duh hun takah ka chhuak ang: Ozil

13th August 2020, 09:08PM

Mesut Ozil chuan contract a hman zawh hma chuan Arsenal chhuahsan a tum loh thu sawiin, a duh hun takah chauh a chhuah tur thu a sawi.

German playmaker Mesut Ozil chu tun hnaiah Emirates Stadium atanga chhuak hnaivai anga sawi a ni a. Arsenal manager hlui Unai Emery leh tuna head coach Mikel Arteta te chuan Ozil hi an khelhtir tam lo hle a, hei vang hian club dang a pan rinna a lian hle.

Kum 31-a upa Ozil hian kar khatah £350,000 a hlawh mek a, a hlawh hnem ngaihtuah hian khelmualah beisei a pha lo thin a, hei vang hian manager pawhin an khelh tamtir loh phah a ni.

Hetiang boruak karah hian Ozil chuan first team ah hmun chang thei turin theihtawp chhuah zel a tum thu a sawi a, contract a neih mek chu a hman zawh hma chuan hmun danga kal a tum loh thu a sawi a ni.

Ozil chuan, “Ka dinhmun hi a chiang hle a, he club-ah hian thuthlung ka ziak a, ka thuthlung ziah chu ka la hmang zo lo a. Ka contract neih lai a zawh hma chuan he club tan hian theihtawp chhuah zel ka tum,” a ti.

“Ka thil tawn mek hian min vaw hniam dawn chuang lo a, hetiang thil hian min tichak zawk thin a. Ka hun kal tawhah pawh ka lo tawng zeuh zeuh tawh a, a hma zawng aia thain ka kir leh thei a ni tih hi tunah pawh lantir leh ngei ka tum a ni,” a ti bawk.

A sawi zelnaah, “He club ka chhuahsan hun tur hi mi sawia innghat loin keimah ngei hian ka ngaihtuah dawn a, ka chhuah duh hunah tak ka chhuak mai dawn a. Contract kha kum hnih emaw, kum thum emaw atan ka ziak lo a, kum li chhung atan ka ziak a, chu chu tu pawhin an zah ve tur a ni,” a ti.

“Season hnih liam ta chhunga thil thleng ka thlir let khan ka lawm a, ka rilru lam pawh a paukhauh phah lehzual a. Chuti maiin ka tlawm mai ngai lo a, theihtawp ka chhuah ang a, bul tantu zinga tel theih ngei ka tum zel dawn a. Ka fit a nih phawt chuan khelmualah eng nge ka tih theih tih hi ka chiang hle a ni,” tiin Ozil chuan a sawi.

Copyright © inkhel.com 2024. All rights reserved.