Roger Federer chuan tennis chu la khelh zel a tum thu sawiin, a chawlh hun tur chu a fa pali teah a innghah thu a sawi.

Swiss superstar Roger Federer chu tennis khel tawh mipa zingah chuan a ropui ber tia sawi hial niin, Grand Slam title 20 zet mai a nei tawh a. Spaniard Rafael Nadal chuan title 19 la tawhin a hnaih tawh hle a, Serbian Novak Djokovic pawhin title 16 la tawhin a hla tawh bik lo hle.

Heng player ropui pathum zinga upa ber, kum 38-a upa Federer chuan pro tennis khelh zui zel a la rilruk thu sawiin, a nupui Mirka nen phir pahnih an neihte chu a chawlh hun tur tichiangtu an nih tur thu a sawi a. A chhungte hlim loh hun hun chu a chawlh hun tur niin a sawi.

Federer chuan, “Ka inkhelhna turah hian kan chhungkuain kan kal thin a, kan vaiin kan zin kual mai thin a, a hautak duh hle,” a ti a.

“Lehlamah chuan a nghahhlelhawm thei hle a, thil phurawm tak pawh a ni a, keimah pawh hian nuam ka ti hle a. Ka tan chuan hetianga chhungkuaa zin kual hi a fuh hlein ka hria a, rilru nghet thlapin ka awm theih phah thin a. Naupang erawh kan zin kualnaah hian an hlim a ngai viau thung,” a ti bawk.

Hmun thenkhatah chuan Federer hian chhangchhe pa nih manah tournament neih lai pawhin zan lama mut mumal loh te pawh a nei fo thin niin a sawi chhuak.

“Kan chhangchhe rih bawk a, a chang chuan zan lamah mut that theih mang loh chang a awm ve fo a. Tun hnaiah pawh kan fa pakhat chu a damsam chiah lo a, pawi a tih thu sawiin, ngaihdam te min dil nghe nghe a. Kei chuan pawi ti lo tura hrilh pahin, khatiang hunah khan a chhungte kan pawimawh hun tak a nih thu ka hrilh a, a mu thei lo a nih pawhin kan menpui ve mai tur a nih thu ka hrilh a ni,” tiin Federer chuan a sawi a.

“Game pawimawh tak khelh tur neih a, semi final emaw, final emaw khelh dawn hnaiha ka mut mumal theih loh hian a chang chuan a buaithlak ve duh khawp mai,” tiin a sawi bawk.