14 May 2019 05:48

inkhel

Ka chhuah ka ring lo: Mesut Ozil

Mesut Ozil chuan kumin nipui transfer window inhawn hunah Arsenal atanga a chhuah a rin loh thu a sawi.

German midfielder Mesut Ozil hian Unai Emery hnuaiah hun tha tak a hmang meuh lo a tih theih a. North London club player zingah chuan a hlawh hnem ber a, kar tin £350,000 zet a la thin a. Heti chung hian Emery chuan a khelhtir tam lo hle a, an club hma lam hun tur a ruahmanah pawh Ozil chu a pawimawh loh thu a sawi chhuak hial a ni.

Ozil hi season tawp dawn lamah Emery chuan tlemin a khelhtir hnem chho leh deuh a, a che chhe hran lo viau a. Emirates Stadium-ah hian kum 2021 thleng contract a la nei mek a, hei hi hman zawh a tum hle.

Kum 30-a upa Mesut Ozil chuan, “Nipui transfer window inhawn huna chhuah ka tum leh tum loh chungchangah sawi a tam hle a. Mi thenkhat chuan min hralh chhuak dawn niin an sawi a, ka thlirna atang hi chuan chutiang thil chu a thlen ka ring lo,” a ti.

“Chhuah tumna hi ka nei hran lo a, helai hmunah hian kum hnih daih contract ka la nei bawk a. Amaherawhchu, eng thil pawh thleng thei a ni a, ka thu a nih miau loh avangin club dangah ka kal ve thut thei reng tho,” a ti bawk.

A sawi zelnaah, “Eng pawh ni se, eng thil nge lo thleng dawn tih chu han ngaichang zel ila. Arsenal-a ka khel thei hi ka lawm a, ka ngaihlu em em a, helai hmunah hian ka hlim em em a ni tih hi ka sawi duh a ni,” a ti.

Tun season chhungin Ozil chuan Emery hnuaiah khelmuala luh loh chang a nei hnem hle a. Spaniard coach hnuaiah hun khirh tak a hmang chho a, heti chung hian a vuivai hran loh thu a sawi.

“Coach in min rawn bia a, ka inkhelh ve dawn loh thu min hrilh a nih chuan ka lo pawm mai tur a ni a, ka tan tih theih dang a awm chuang lo a. A lehpeka khel thei tura theihtawp chhuah kha ka tih tur pawimawh ber chu a ni,” a ti.

“A fit thei ang bera awm kha ka tan a pawimawh a, hriselna vawn uluk a pawimawh em em bawk a, inthlahdah phah miah loa inbuatsaih chhunzawm zel a ngai a. Tunah chuan kei pawhin ka thawhrim rah ka tel mek a ni ber a, ka inkhelh hnem ve theih phah tawh a. Engkimah thutawp chu coach siam vek tur a ni a, chu chu pawm thiam a ngai a ni,” a ti bawk.

Ozil chuan, “Tun season chhungin ka inhliam zeuh zeuh a, game thenkhat ka khelh theih loh phah a. Mahse, ka dam that phawt chuan pangngai takin ka inkhel thei zel a. Ka thiamna neih dan ka hria a, eng nge ka tih theih ka hre chiang hle a. Mi zawng zawng hian hlut zawng leh thiam zawng an nei theuh a, ka thatna chu No. 10 ah hian a awm,” a ti.