Luka Modric chuan Ballon d’Or a dawn hnuah Real Madrid chu nuam a tih thu sawiin, Real-ah chuan football a chawlhsan thlenga awm reng a duh thu a sawi.

Kum 33-a upa Luka Modric chuan 2012 khan Tottenham Hotspur chhuahsanin Bernabeu-ah hian a lut a. Real chu trophy eng emaw zat a lakpui tawh a, Champions League title phei chu vawi 4 a la tling tawh a ni.

Inter Milan chuan Modric hi Serie A lama lak luh an duh a, mahse Modric chuan Italy lam pan hi a duh loh thu a sawi a. Real Madrid chu a tan chhuahsan phal chi a nih loh thu sawiin, an chhungkuain Spain nuam an la tih thu a sawi.

Modric chuan, “Real Madrid-ah hian kum hnih daih contract ka la nei mek a, hei hi pawh sei belh theih ka la beisei hle bawk a. He club hian duat takin min enkawl a, helai hmunah hian football khelh ka chawlhsan thlenga awm theih ka duh a. Kan chhungkuain Madrid khawpui hi nuam kan ti a, he club lian taka awm zel hi ka duhthusam a ni,” a ti.

Croatia midfielder Modric chuan Cristiano Ronaldo, Antoine Griezmann, Kylian Mbappe leh Lionel Messi te khumin mi mal chawimawina sang Ballon d’Or a dawng a, 2007 a Kaka hnuah Messi leh Ronaldo ni loin he chawimawina an dawn leh hmasak ber a ni.

“Ka lawm dan chu sawi thiam a harsa a, sawi vak ngaihna pawh ka hre lo a. Ka zinkawng min hriatsaktute chungah lawmthu ka sawi mawlh mawlh duh a, chawimawina ka lak dawn khan ka hnuk a ulh hle a, mahse ka mittui kha ka dang thei hram a. Ka tan chuan kha zan tluka ropui kha a la awm lo ang,” tiin Modric chuan a sawi.

2018 chhungin Modric hi a che fuh hle a, FIFA Best Men’s Player atan an lo thlan tawh bakah Croatia chu FIFA World Cup final a luhpui a. Real Madrid chu a zawnin UEFA Champions League title vawi 3 a lakpui thei bawk a ni.