20 Jun 2019 05:42

inkhel

Ka chawlh hmaa Pacman hmachhawn ka duh: Amir Khan

Amir Khan chuan a kum a tam chhoh ve tan avangin inhnek chawlhsan a hnaih tial tial tih a hria a, boxing a chawlhsan hma ngei hian Manny Pacquiao nen inhnek theih a duh thu a sawi.

British boxer Amir Khan hi a tlawm atanga thla thum hnuah boxing ring a luhchilh leh dawn a, July 12 hian Saudi Arabia-ah Indian boxer Neeraj Goyat nen an inhnek dawn a. April thlaah khan WBO welterweight champion Terence Crawford chuan Amir Khan hi a hneh a, tuna a inhnek leh turah hian Khan chuan chak theih ngei a inbeisei hle a. An inhnek zarah hian Khan chuan £7 million zet a hlawh dawn a ni.

A vanglaiin Amir Khan hi vawi 33 a chak tawh a, vawi 5 chu a tlawm ve tawh a. Boxing ring chhunga a zinkawngah hian mi lar tak tak a lo hneh teuh tawh a ni.

Kum 32-a upa Amir Khan chuan a kum a tam chhoh hnuah chawlh a hnaih ve telh telh tih sawiin, a zinkawngah thil tih puitlin loh pakhat lian tak a awm niin a sawi a. Inhnek a chawlhsan hma ngei hian Manny Pacquiao chu hmachhawn theih ngei a duh thu a sawi chhuak.

Khan chuan, “Kei leh Manny Pacquiao chungchang hi an sawi rikna a rei tawh a, thawm a awm reng chung hian a tak ramah engmah a thleng thei lo a. Tun tumah chuan boxing ring chhungah kan thlem thei tawh maithei a, kan inhnek thei a nih chuan chawl tawh mah ila pawi ka ti lo khawp ang,” a ti.

“Tuna ka inhnek leh chhan pawh hi a hnua Pacman nen kan inhnek thei ka beisei vang a ni a. Tun tumah hian tha taka ka chet chuan a aia sangha lian zawk man tur a awm ngei dawn a ni tih ka hriat vang a ni a. Kumin kum tawp hma ngei hian tu emaw lar ve tak nen inhnek theihna hun tha a awm thei ang a, a nih loh vek pawhin kum thar tir lamah te pawh a remchang dawn a ni,” a ti bawk.

A sawi zelnaah, “Saudi Arabia-ah hian thuneitute kan kawm kual nual tawh a, boxing hi an tuipui em em a. Show pakhat chauh hi an duhtawk mai bik lo a, show tam zawk awm thei se an duh a. Heti a nih chuan Manny Pacquiao nen hian inhnek thei ila, Middle East-ah hian boxing chu a vul chho viau tawh dawn a ni,” a ti.