Pathianni khan Brisbane-ah Jeff Horn chuan Manny Pacquiao hnehin WBO world welterweight title a la.

World Champion vawi riat ni tawh Pacquiao nena an inhnek tum hian Horn hi chak lo zawka ngaih vek a ni a, Pacman-a coach mai bakah Lennox Lewis leh Kobe Bryant pawhin mak an tih thu an sawichhuak hial.

Sawiselna karah kum 29 mi Australian Jeff Horn chuan, "Mi tam takin an awih lova, a then phei chuan vannei angah min ngai.

"Sawiseltu chu an awm reng dawn, mahse kei chuan ka chak niin ka inhria. Queenslanders pawhin ka chak tih an hrechiang a, khawvel hmun hrang hrang amite pawhin ka chak tih hi an pawm a ni," tiin a sawi.

Jeff hian a khingpui Pacman chu mi huaisen leh sport-a legend a nih thu a sawi a. Zirtirtu ve mai khan tunah World title a la ta chu a ni a, a school-a a kir leh hunah naupang te pawhin an chhuah a rin thu a sawi bawk a ni.

Australian Prime Minister Malcolm Turnbull pawhin, "Australian chanchin ropui tak a ni e, ka lawmpui e. Brisbane school teacher kha tunah chuan pundits tam tak awih loh khawpin World Champion a ni ta," tiin a lawmpui thu a tarlang nghe nghe.