11 Jan 2019 03:33

inkhel

​Ka career a tawp emaw ka ti hman – Nasri

Arsenal leh Manchester City player hlui Samir Nasri chu a thisena phalloh thil hmuh a nih vangin thla 18 chhung zet inkhel thei lo tura hrem a nih hnuah kumin January ni khat atang khan a inkhel leh thei a, nikum December thla khan West Ham chuan tun season chhung atan contract an ziahpui.

Premier League title vawihnih chawi tawhtu Nasri hian phalloh thil engmah a tih loh thu leh a football career a tawp emaw a tih hman thu a sawi. Kum 31 mi chuan Sky Sports a hrilh danin, “Tun thleng hian ka lung a la awi lova, a chhan chu phalloh thil engmah ka tih loh vang a ni,” a ti.

Sawi zelin French midfielder chuan, “Vitamin ka ei hnem deuh vang chauh a ni a, ka damloh avanga ei ka ni. Daktawr lehkha pawh ka nei veka, mahse min pawmsak lo. Ka career-ah kum khat ka hloh phah a, thawkkhat lai phei kha chuan kum li min hrem an tum hman nghe nghe. Thil tam tak ka ngaihtuaha, ka career a tawp emaw ka ti hmana, mahse tunah hian hun remchang dang ka nei a ka vannei hle in ka hria.

“Kha hun chhung kha ka career-a hun thim ber lai a ni a, khawvela hreawm ber a ni bawk. Chhungte leh thiante tanpuina neih lova, mahni chak bawk si loh chuan rilru lam beidawnna tawpkhawk a thlen theih dawn zia ka hriatthiam phaha, a chhan chu kan hmangaih ber min laksak a ni. A hma angin kan awm leh thei dawn em tih a hriat loh.

“Mahse tunah chuan a tha lam zawngin keimahah nghawng a nei a, thil ka thlir dan pawh min thlaksak. A hma kha chuan ka vanneih zia leh malsawmna ka dawn nasat zia hi ka lo hre ngai lo va, tunah chuan a tlachawpin engkim ka ti tawh a, ka theih ang tawka hlim ka duh a, ka team-mate te ka theih ang tawka puih ka duh; a chhan chu ka hloh ta vek emaw ka ti hman a ni,” a ti.