Juventus zawm tum lo Arthur

28th May 2020, 03:05AM

Barcelona leh Juventus te chuan an midfielder Arthur leh Miralem Pjanic-te chu inthleng tumin an inbe mek niin chanchinbu mite chuan an tarlang nasa hle tawha, Juventus hian Barcelona midfieder Arthur chu an duh hle nia sawi a ni a, an midfielder Pjanic chu a man aiah pek an inhuam nia sawi niin, Barca hian Pjanic hi an iai lem lo nia tarlan a ni bawk.

Barcelona chief football officer (CFO) chuan Juventus nen inbiakna an kalpui thu a sawi thawia, player hming lam ri lem lo mahse chanchinbu mite chuan Arthur leh Pjanic inthleng chungchang a nih an ring fur.

Hetiang hian thuthang tam hle mahse Arthur hian Juventus pan tumna a neih loh thu leh, Barcelona-ah bak rilru a pek loh thu a sawi niin Sky Sports chuan thu an dawng tih an tarlang.

Coronavirus avanga sum lamah harsatna a awm avangin Barcelona hian season tharah an team an thawm tha duh a nih chuan player an hralh chhuah emaw player inthleng zawnga an kal a ngai nia sawi a ni a, mahse Arthur hian chhuah tumna a nei lova, Arthur leh Pjanic te chu team hnihte hian an inthleng thei dawn lo niin tarlan a ni chho leh tawh.

Brazilian midfielder kum 23 mi Arthur hi Brazilian club Gremio academy chhuak a ni a, kum 2018 khan Barcelona chuan an laluta, a manah euro maktaduai 40 vel an seng a ni.

Copyright © inkhel.com 2024. All rights reserved.