European club ropui berte zinga chhiar hmaih ngai loh tur Italian giants Juventus hian hun engemaw deuh lai khan chhan hrang hrang avangin boruak chhia an tawnga, Serie B ah te hial an tla thla a nih kha. Tunhnai chho ah Juventus thar kan hmu mek zela, tun season ah phei chuan league title ni ringawt lovin Champions League nomawi hial chawi thei dinhmunah an dinga, June ni 6 hian Barcelona nen Champions League champion nih an inchuh ang.
80s tawp lam leh 90s tir lam khan Juventus hian Europe chu sawi loh Italy ah ngei pawh el phak meuh loh a nei a, Maradona telna Napoli bakah European football awp bet hneh thei em em AC Milan te kha an ngam lo thin hle.
Kum 1994 a Marcello Lippi a'n Juventus a enkawl atang khan boruak a dang chho tana, khatih hunlaia striker hlauhawm ber pawl Roberto Baggio leh rawlthar tha za em em mai Alessandro Del Piero te ho a han enkawl chho tak tak a, 1996 ah Champions League nomawi an chawi ta hial a nih kha.
Turin khaw club Juventus hi Champions League final a Ajax an hneh hnu khan an tawp mai lova, Zinedine Zidane. Edgar Davids leh Inzaghi te ho an han la leh te te a, khatih hunlaia Juventus team kha team tha tak zawng an ni chiang e. Amaherawhchu Spanish club Barca, Real Madrid, Deportivo leh Valencia te ho an rawn harh thar ve hunlai tak a ni a, 2000 kum hnaih lamah khan English leh Spanish club an lian chho hle.
1997 ah German club Dortmund chu Champions League final ah an hneh lo tlat peka, 1998 ah final hial inpet kai leh mahse Real Madrid an ngam lo leh bawk. 2003 khan Champions League final ah thleng leha, AC Milan hmaah an tlawma, khati chung pawh khan Juventus club kha club chhia a sawi tur an ni ngai lo hrim hrim a. Buffon, Nedved, Trezeguet te bakah Thuram te ho an chhawr chhova, Juventus club boruak kha chhia tia sawi tur a ni ngai lo.
2001 a chinah Serie A club tha ten an player hraw tak tak an chan tana, 2001-02 season a Zidane a'n Juventus atanga Real a pan hnu 2002 ah Ronaldo pawh Real Madrid ah a insuan ve bawk. 2001 ah vek khan Veron chu Man Utd in an la ve bawka, Serie A in ngaihhlut a hlawh lo tial tial a ang ta ber.
2006 season tawp lam a inher chhuaka, Calciopoli scandal ah Juventus chu club thiam loh chang zinga thiam lohna ngah bera ngaih a ni a, Serie A title an lak tawh pahnih lai hlihsak an nih bakah an club chanchina a vawikhatna atan Serie B ah tlak thlak tir an ni nghal bawk.
An star player Thuram, Ibrahimovic, Zambrotta leh Cannavaro te an chan phah hiala, Buffon, Del Piero, Trezeguet leh Nedved te erawh Juventus tan an rinawm tlata, hei hian Juventus club chu footballer te tan pawha "professional career" hial hlan ngamna khawpa club ropui a nihzia a pholang chiang hle awm e.
Milan, Lazio leh Fiorentina te pawh hremna pek an ni a, an hremna dawn erawh a nep deuh thung. Juventus awm loh Inter Milan in an chhawr viaua, Serie A ah hneh takin ro an rel a ni ber. Mourinho hnuaiah Champions League hial an chawia, Serie A ah inpet kai rang leh hle mahse dinhmun tha luah turin Juventus chuan hun an mamawh tam angreng fu.
Manager hrang hrang an chhawr kual hnuah an player hlui Antonio Conte chu 2011 khan manager atan an ruai ve ta a, khatih hunlai kha Juventus stadium a an insuan luh leh hunlai tak a ni ve bawk. 2011 atang khan The Old Lady hian hnunglam a hawi leh tawh hrih lo a tih theiha, 2003 hnua Seria A a an champion leh hmasakna ber an tawnga, an champion chhunzawm chho ta zel a nih hi.
Italy national team enkawl turin season hmasa mai khan Conte chuan Juventus a chhuahsana, Massimialano Allegri a'n a hmun ruak a rawn luah chhunzawm nghal. Allegri hian a season hmasa berah Champions League final a rawn thlenpui ta nghala, an kalkawng erawh a awlai bik lo. Group stage ah 2-na niin Olympiacos lakah point 1 chiahin an fal a, an group hmahruaitu chu season hmasa finalist Atletico Madrid an ni. 2nd round ah season hmang chhe tak Dortmund chu awlsam takin an hneh theia, Monaco leh Real Madrid te an ngam chho va, final hial an rawn thleng chho ta a ni.
Tuna Juventus team hi team tha ber ang hiala sawi tur chu an ni lo. Amaherawhchu midfielder te an hraw the thaw hle a, tunlai football khawvela box to box midfielder hlauhawm ber pawla sawi theih ve ve Arturu Vidal leh Paul Pogba te tawnhriat ngah tawk tak Pirlo a'n a ho renga, tlarhnungah tawnhriat ngah ve tawk thawkhat tho Evra leh Chiellini te bakah chuai thei lo Buffon si ban nghaktu atan an la nei cheu. Morata leh Tevez te an form reng bawka, 1996 hnua an champion leh hmasakna ber tawng thei dinhmuna an dinna hi an theihna zawng zawng nena chhawr tangkai an tum ngei ang le.