14 Feb 2020 04:13

inkhel

Juventus leh Real Madrid te’n Pogba man to an ti

Manchester United chuan Paul Pogba chu nipui transfer window inhawn hunah chhuah an phalsak dawn a, hetih rual hian amah beiseitu Juventus leh Real Madrid te chuan a man chu to an tih thu an sawi.

French midfielder Paul Pogba hian hun eng emaw atang khan Old Trafford chhuahsan a duh thu a sawi tawh a, hmun dang a pan theihna tur hian hma pawh a la chho nual tawh a. Real Madrid leh Juventus te chuan Pogba hi an hnena khel turin an duh thu an lo sawi ve ve tawh a ni.

United chuan Pogba hi man tlawm taka chhuahtir chu an tum lo hle a, a hlutna dik tak ang vel tal hmuh dan an ngaihtuah a, hei vang hian a manah pawh €100 million (£83 million) vel bawr an chhiar a ni.

Paul Pogba beiseitu club lian pahnih, Real Madrid leh Juventus te chuan Manchester United in a man an chhiar chu to an tih thu an sawi a. Mahni khelhna club chhuahsan tumtu heti zata lei chu an hreh deuh niin an sawi a, a aia tlawm zawka lei theih an duh a ni.

Pogba hian 2016 ah khan Manchester United a zawm tha leh a, hemi hnuah hian beisei angin a che tha vak lo a. A chet chhoh dan enin Juventus leh Real Madrid te chuan tuna United-in a man an chhiar zat hi a phu meuh lo niin an ngai a, hei aia hniam zawk hi chhiar turin an phut a ni deuh ber.

A agent Raiola chuan Pogba chu a khelhna thin Juventus lama kir leh a hreh lo niin a lo sawi chhuak ve bawk a, Italy ram chu Pogba tan chuan a hmunpui a nih thu a sawi tel bawk.

Raiola chuan, “Italy hi Pogba tan chuan a khaw hmun nghet ang tluk a ni a, a in a ni. Juventus lama kir leh hi a hreh hauh dawn lo a, chutih rualin Euro te hi han zo phawt se, eng thil nge thleng dawn tih chu kan ngaichang dawn ania,” a ti.

Nikum September thlaah khan a ke a tihnat avangin a inkhel tam thei lo hle a, thla thum chhung ngawt a chawlh phah a, hei vang hian Manchester United tan vawi 8 chauh a inlan theih phah a ni.