Juventus Stadium-ah mual neitu Juventus chuan 2-1 in mikhual Real Madrid an hneh a, Champions League semi final 1st leg-ah Champion lai Real Madrid an tlawm.

Juventus tan Morata chuan Tevez thawhrah a tel a, minute 10 an khelh tlin hmain Morata hian goal khat a khung. Ronaldo chuan darkar chanve an khelh tlin hma hretin James siam tha zet chu tauh lutin, Champions League-a goal khung hnem ber a ni ta a, mahse second half-ah penalty atangin Tevez chuan Juve goal hnihna a khung a, 2-1 in Juventus chuan hnehna an chang ta a ni.

Juventus 2-1 Real Madrid

(Morata 9', Tevez 58' pen) (Ronaldo 27')

Real Madrid XI: Casillas, Carvajal, Varane, Ramos, Marcelo, Pepe, Kroos, Isco, James, Bale, Ronaldo

Juventus XI: Buffon, Lichtsteiner, Bonucci, Chiellini, Evra, Marchisio, Pirlo, Sturaro, Vidal, Tevez, Morata

First half-ah goal hnih kan hmu a, Juventus hian goal an khung hmasa zawk a, Tevez shot tha zet chu Casillas chuan save perin, far post-a lo awm Morata chuan awlsam takin a pet goal, a club hlui lamah goal a khung ta a ni.

He goal hi 27th mins-ah Ronaldo chuan rulin, James cross tha zet chu hnai set sawt atangin Ronaldo chuan a tauh goal ta a ni.

Champions League-a goal khung hnem ber chu Cristiano Ronaldo a ni ta e. Goal 76 khung tawhin, Record holder ni thin Messi chu goal khatin a khum. Tin, Ronaldo hian Champions League semi final a khelh tawh zawng zawngah goal 9 lai a khung ta. Ani aia UCL semi final goal khung hnem hi an awm lo.

First half-ah hian Juve tana langsar ber chu Serie A top scorer Tevez a ni a, Real Madrid-in bul tan tha lo mahse darkar chanve an khelh tlin meuh chuan ball an chang hnem tawh a, an game an khel chho thei tawh a, first half tawp dawn tepah James Rodriguez chuan Juve goal bar a tauh per dawp, hemi per hi Marcelo chuan goal-ah a chantir teuh hle nghe nghe a ni.

Second half tan tirah game physical tak kan hmu a, goal mouth action aiin foul kan hmu hnem zawk. Second half minute 15 an khelh tlin hma hretin Juventus chuan penalty an hlawh chhuak a. Real Madrid hian na takin an nawr a, Marcelo shot Ramos-a'n a lo dan hnuah Juventus chuan Tevez leh Morata hmangin counter attack an nei. Hei hi Carvajal leh Marcelo te chuan umin, Tevez chuan box chhungah ball a tlan luh pui a, Carvajal chuan Tevez hi a titlu ta hlauh mai.

English referee Martin Atkinson chuan penalty a ham ta a. He penalty hi Tevez chuan petin, goal lai takah a pet a, Casillas erawh vei lamah a dive a vangin a goal chiang hle. Tevez hian tun season-ah Juventus tan competition hrang hrang atangin goal 50 a khung tling ta der mai leh. Juventus hian goal dang an khung leh teuh hle a, Varane tihsual chu bench atanga rawn lut Llorente chuan changin, Casillas chiah a hmachhawn tawh, Casillas a rawn up tha hle a, angle a khar that em avangin Real Madrid-in goal dang an phurh belh ta lo a ni. Inkhel tawp thlengin goal dang a lut tawh lo, 2-1 in mual neitu Juventus chuan hnehna an chang ta a ni.

Inkhel hmuhnawm tak a ni a, tun season Champions League-ah Ronaldo chuan goal 9 khung tawhin top scorer a ni mek. Ronaldo away goal khat hi a la hlu ngei dawn niin a lang. Juventus hian goal hnih khung mahse Santiago Bernabeu-ah Champion lai hian lehthal an tum dawn, chu erawh khawvel hmuh chak a ni leh ngei dawn e.

He match-ah hian Bale a khel tha lo hle a, hun tawp lamah Jese chuan a rawn thlak nghe nghe. Ancelotti chuan Hernandez dahluh mahse danglamna a thlen thei ta chuang lo. Juventus game a fakawm a, counter attack-ah an hlauhawm em em, an defending a tha em em bawk si nen, Juventus tan Tevez a khel tha em em a, goal khung pawh a phu hliah hliah a ni.