Champions League group H inkhelah Juventus chuan Juventus Stadium-ah La Liga club Valencia lo mikhualin, mual neitu Italian champions hian si khat faiin hnehna an changa, round of 16 an lut chiang tawh.
Goal lut awmchhun hi Mario Mandzukic-a thun niin, Cristiano ronaldo-a assist a ni. Juventus hian khelh ngaah point 12 hlawhchhuakin group hmahruaitu an ni chhunzawm zela, valencia erawhin point nga chiah la hlawhchhuakin pathumnaah an awm thung.
Juventus 1-0 Valencia
(Mandzukic 59')
PLAYER RATINGS
Juventus: Szczesny 7, Bonucci 7, Chiellini 7, Cancelo 8, Sandro 5, Pjanic 6, Bentacur 6, Matuidi 6, Dybala 7, Ronaldo 9, Mandzukic 8. Subs:, Douglas Costa 5, Cuadrado 6.
Valencia: Neto 8, Gaya 7, Diakhaby 7, Paulista 6, Wass 6, Guedes 6, Kondogbia 6, Parejo 5, Coquelin 5, Mina 6, Rodrigo 4. Subs: Soler 5, Gameiro 5, Batshuayi 5.
Match Report
Inkhel bul tan a ni a, minute tam khelh a nih hmain Cristiano Ronaldo chuan goal shot nei nghalin, box pawn atangin a pet a, mahse goalkeeper a zawn hle a, Valencia keeper Neto a buai phah lo. Juve lam hian inkhel an thunun a, Valencia pawh counter attack-ah an nep bik chuang lo. Juve hian hun tha insiam nualin, darkar chanve ral hmain goal khungna hun an nei nual hman.
Darkar chanve khelh a nih hma hian Juve midfielder Miralem Pjanic chu penalty box chhungah tih tluk niin, Juve hian penalty beisei viau mahse referee-in penalty pek tlakah a ngai lo thung. Darkar chanve khelh a nih hnu pawhin inkhelin danglamna em em a nei lo. Half time hma chiahin Valencia-in goal an khung teuh hle a, corner atang ball vawrh luh chu Valencia defender Diakhaby chuan tha taka lo tauhvin, Juve keeper Szczesny-a’n a save tha hle a, first half a tawp zui ve nghal bawk.
Second half tan a ni chiaha, Juventus-in free kick an hmu nghal. Free kick hi Ronaldo chuan petin, pet chhe lem lo mahse goalkeeper a zawn hle a, eng a ni lo. Game a danglam mawh hle a, mahse darkar khat khelh a nihin Juventus lamin goal an khung. Joao Cancelo chuan ball khalh pheiin, ani hian box chhunga awm Ronaldo a pe a, Ronaldo hian box chhungah ball chawkin, lei hrulah goal hma lamah a pe phei a, Croatian striker Mario Mandzukic chuan hnai tak atangin a lo tlawh lut.
Juventus-in goal an khung hnu lawk hian Valencia-in goal an khung emaw an ti a, mahse pawm a ni lo. Free kick atanga ball vawrh luh chuan Diakhaby chuan goal-ah khung mahse , goal khung nan hian a kut a hman avangin pawm a ni lova, yellow card pek a ni nghal bawk. Hemi hnu hian Juve-in hun tha nei lehin Dybala free kick pet atangin Mandzukic chuan lo petin, Neto zawnah tak a peta, Valencia keeper tan hian thil harsa a ni lo. 68mins-ah Neto hian Dybala pet tha takin a save leh bawk.
Juve hi an hlauhawma, a khat tawkin huntha an insiam deuh reng. Hun tawp hnaih lamah Mandzukic-a’n box chhung atanga a pet chu Valencia keeper Neto bawk chuan lo save-in, save harsa erawh a ni lo. Juventus-in inkhel an thunun tluana, Valencia hian nawr let ve thin mahse duh ang tawkin an hlauhawm thei lova, inkhel hi 1-0 in tihtawp a ni.