Serie A club lian Juventus chuan tun nipui bazar lai khan tuma rin lawk lovin Real Madrid atangin Cristiano Ronaldo an lei chhuak a, bazar hun inhawn leh hunah Real Madrid player dang lakluhna remchang an nei leh dawn niin media-te chuan an tarlang.

Real Madrid hian nipui bazar lai khan Chelsea atangin kumin World Cup-a Golden Glove lawmman dawngtu goalkeeper Thibaut Courtois chu an laluta, Courtois hi keeper tawnhriat ngah Keylor Navas nen first choice keeper nih tumin Real Madrid-ah hian an inel mek.

Juventus hian hun rei tak chhung an lo kawl tawh veteran goalkeeper Gianluigi Buffon chu tun nipui khan an chhuah zalen ve bawk a, Buffon thlak tur hian hming langsar lakluh nei lovin, Genoa keeper Mattia Perin chiah an lalut. Perin hian Buffon-a thachhang lo dawl reng tawhtu Wojciech Szscesny chu a la nek chhuak zo rih lova, tun hnaiah Arsenal keeper hlui Szscesny hi a khel tha em em hran lo bawk.

Juventus hian keeper tha sa lakluh an duh niin media tam takin an tarlang a, Real Madrid a zawna Champions League vawithum lakpui theitu Costa Rican goalkeeper Navas hi an hmu tai hle a nih hmel.

Courtois an neih tawh tho avangin Real hian 31 mi Navas hi an chhuahtir hreh lutuk a rinawm lova, club hnihte inkarah hian inremna a awm mai pawh a beiseiawm viau.

Navas hi a naupang tawh lova, a man pawh hi a to lutuk a rinawm tawh lem lo. Juventus hian thil theih loh tluka ngaih thin tun nipui bazar lai khan an lo ti tawha; Ronaldo chu Turin khawpuiah an thlem lut. Champions League lak an tum hle tih a langa, an that lohna lai ber anga lang mek chu Navas hmang hian an siamthat mai pawh a rinawm hle a ni.