Manchester United midfielder Paul Pogba chu Juventus chuan January thla hian Italy lama thlem chhuah an tum niin an sawi.

Paul Pogba chuan 2016 khan Manchester United chu record siamin a zawm a, mahse beisei angin boruak a nei thei meuh lo a, United boss Jose Mourinho hnuaiah a tlatlum lo sawt hle a. Hetiang boruak a awm chhoh nasat tak em avang hian Old Trafford atanga inthiar chhuah mai pawh a hreh tawh lo hle a ni.

Hetiang boruak neuh neuh a awm chhoh takah chuan Juventus chu an inring viau mai a, January thlaa transfer window inhawn hunah Serie A champion te hian Pogba chu loan a lak an duh a, nipui transfer window inhawn huna a ngheta lak zui theih tura inremna ziah an duh a ni.

UEFA Champions League dan tharah chuan kum 25-a upa Pogba hian Red Devils tan tel tawh mahse Juventus a zawm a nih pawhin Old Lady tan pawh hian a khel thei dawn tho a. Hei vang tak hian Juventus tan pawh France star hi an lak theih chuan a tangkai thei viau dawn tho a ni.

Juventus midfielder pawimawh Sami Khedira leh Emre Can te chu inhliam vangin an chhawr fumfe thei rih lo a, hei vang hian an hmun ruak luah thei tur hi an melh mek a, Pogba chu an ai awh thei tura an ngaih a ni.

Old Lady hian Paul Pogba hi an la thei a nih chuan Real Madrid atanga an lak thar Cristiano Ronaldo nen an inkawp chhoh chuan Europe khawmualpuiah chuan an hlauhawm tham hle tura ngaih a ni a, UEFA Champions League title la thei tura beiseiawm pawl an nih theih a rinawm hle.

Pogba hian Juventus lama kal leh chu a chak thu a lo sawi chhuak tawh bawk a, mahse hetiang thleng tur hi chuan Manchester United chuan sum tam tham deuh hlek an phut ngei a rinawm a ni.