Juventus chuan Paul Pogba chu lei an duh hle a, pawisa lampangah harsatna an neih deuh avangin an mamawh angte theh chhuak turin Adidas puihna an dil dawn niin an sawi.

France midfielder Paul Pogba chuan Manchester United chhuahsan a duh thu a sawi tawh a, thenkhatin Real Madrid nen an sawi zawm laiin, Serie A champion Juventus nen pah an sawi zawm nasa hle.

Kum 26-a upa Pogba hian Asia khawmualpui lama hun a hman laiin Old Trafford chhuahsan a duh thu a sawi chhuak a. Hetiang tawngkam a neih takah chuan thu a thang kual nasa hle a, nipui transfer window inhawn lai ngeia a chhuah ringtu pah an tam viau a ni.

Old Lady chuan Manchester United midfielder hi lak an duh viau a, mahse Red Devils hian a man atan £135 million an chhiar bur mai si a. Hei vang hian Juventus chuan an club sponsor leh Pogba mi mal sponsor ni bawk Adidas chu pun mai an duh a, an sum mamawh ang zat chu tumsak mai tura ngen an duh a ni.

Serie A champion Juventus hian kum 8 chhung atan Adidas hi thuthlung an ziahpui a, an inremnaah chuan company lian hian Juventus chu hemi chhung hian £366 million zet an pe dawn a ni.

Italy rama chanchinbu lar pakhat Corriere dello Sport chuan Nilaini zingah khan an chanchinbu phek hmaah Pogba chanchin hi langsar deuhin an chhuah a, a thupuiah pawh, “Thil lawmawm tak, phut zawk theihna. Sponsor an inrawlh a, Pogboom Juve” tiin an dah a ni.

Paul Pogba hi kum thum kaltaah khan Juventus atang hian a chhuak a, a hun laia transfer fee sang ber ni turin Manchester United chu £89 million in a zam a ni.

Old Trafford a luhchilh hnuah Pogba hian game 142 chu a khel tawh a, hengah hian goal 31 thun tawhin, mi goal thun tur vawi 29 chu a siamsak tawh bawk a. Season hman zawh takah khan Pogba hian game 47 a khel a, goal 16 thunin, mi goal thun tur vawi 11 chu a siamsak a ni.