Juventus atangin Ronaldo a chhuak dawn lo: Paratici

16th October 2019, 01:10AM

Fabio Paratici chuan Cristiano Ronaldo chu 2022 thleng Juventus-a contract nei a nih thu sawiin, hemi hma hi chu hmun dangah a chhuak dawn lo niin a sawi.

Juventus sporting director Fabio Paratici chuan tun hnaiah chuan Cristiano Ronaldo chu hmun dang pana a chhuah mai a rin loh thu a sawi a. Tun hnaiah Portuguese superstar hian hmun dang pan a rilruk nia sawi a awm leh thin a, hei vang hian Paratici hi a tawng chhuak ta a ni.

Real Madrid chhuahsana €112 million zeta Juventus a zawm hnuah Cristiano Ronaldo chuan 2022 thleng contract a ziak a. Kum 34-a upa Ronaldo hian season liam taah khan Serie A bikah goal 21 a thun a, inelna hrang hrangah chuan goal 28 a thun tling a. 2019-20 season khelh tawh chinah goal 4 chu a thun leh tawh a ni.

Thawhtan zanah khan Euro 2020 qualifying match-ah Portugal chuan 1-2 in Ukraine an hneh lo a, he inkhelah hian Cristiano chuan goal a thun a, goal 700 a thun tlinna chiah a ni.

Paratici chuan, “Cristiano Ronaldo hi a hmabakah hian a chiang hle a, a tih tur hi a hre chiang em em a. Tun hnaiah chhuak dawn hnai angin thu a thang nual a, kei chuan a chhuah hi ka ring hauh lo,” a ti.

“Tun season tawpah mai ni lo, a hnuah pawh Ronaldo hi Juventus atang hian a chhuah ka ring lo a. Contract nei lai a ni a, a lakah hian kan lawm a, amah pawh hi Juventus-ah hian a hlim zel bawk a, hei vang hian a chhuah hi a rinawm lo hrim hrim a ni,” a ti bawk.

Copyright © inkhel.com 2024. All rights reserved.