Serie A lamah champion an awm ta der mai a, champion hi tu dang ni lovin season liamta pasarih chhunga champion tawh Juventus bawk an ni a, Italy-ah anmahni elpha thei an awm meuh lo.
Khelh nga la bak mahse Juventus hi lehpelh theih an ni tawh lova, khelh 33-ah point 87 lai an hlawhchhuak tawh. Pahnihnaa awm Napoli chuan khelh ruk an la nei a, Juventus aiin point 20 laia an hniam avangin Juve hi an champion ta a ni.
Juventus hi Serie A-ah a zawnin vawi riat lai an champion ta a, an champion-na game-ah hian Fiorentina hmachhawnin 2-1 in Juve hi an chak. Juve hian si an phur hmasa a, mahse Fiorentina hi Alex Sandro-a goal leh Fiorentina player German Pezzella own-goal hmangin an lehthal.
Juventus 2-1 Fiorentina
(Sandro 37’, Pezzella 53’) (Nikola Milenkovic 6’)
Line Up:
Juventus: Szczesny, Cancelo, Rugani, Bonucci, Sandro, Can, Pjanic, Cuadrado, Matuidi, Bernardeschi, Ronaldo. Subs: De Sciglio, Kean, Bentancur.
Fiorentina: Lafont, Milenkovic, Pezzella, Ceccherini, Hancko, Dabo, Veretout, Mirallas, Benassi, Simeone, Chiesa. Subs: Gerson, Fernandes, Muriel.
Match Report
Juventus hian 4-4-2 formation an hmanga, Szczesny chuan si ban nghakin, defence-ah Joao Cancelo, Daniele Rugani, Leonardo Bonucci leh Sandro-te an intlar. Midfield-ah Emre Can leh Miralem Pjanic-te awmin, a sirah Blaise Matuidi leh Juan Cuardrado-te an awm a, hmatawngah Bernardeschi leh Cristiano Ronaldo-te an inkawp bawk.
Fiorentina pawhin 4-4-2 formation tho an hmanga, Lafont chuan si ban nghakin Milenkovic, Pezzella, Ceccherini leh Hancko-te defence-ah dah an ni. Midfield-ah Veretout leh Dabo te awmin, a sirah Mirallas leh Benassi-te an awm bawka, hmatawngah Chiesa leh Simeone-te inkawp tir an ni thung.
Inkhel tan a ni a, minute nga pawh a ral hma in Bernardeschi chuan veilam atangin Ronaldo-a tan ball a cross a, mahse Ronaldo hian duh angin ball a pet fuh chiah loh avangin hlauhawmah a chhuak lo. Minute tlem a ral leh tih Fiorentina-in hma an hruai; Chiesa chuan dinglam atang Juve box chhungah ball a cross lut, Szczesny chuan lo khawihin Milenkovic-a tan a rem phah hle a, Milenkovic hian goal-ah a chantir ta a ni.
Minute sawm chuang hret khelh a nihin Chiesa chuan ball a khalha, Juve goal lam a pan; Box pawn chiaha awm Mirallas chu ball pe in , Mirallas hian Juve goal-ah a pet zuia mahse goal a thlawh khum. Minute sawmhnih chuang khelh a nihin box pawn deuh chiah atangin Bernardeschi chuan Fiorentina goal-ah ball a chhuih ve leh a, a goal teuh angreng hle.
Darkar chanve khelh a ni chho va, Juve chuan final-third ah ball inpe kualin hmun awl an zawnga, Pjanic chuan hmun awl hmu in goal-ah a ke veilamin a shoot, Fiorentina goalkeeper Lafont chuan a lo save. Hemi hnu lawk hian Simeone leh Veretout-te an in ‘combi’ a, Chiesa ball pek niin, Chiesa tan chance tha tak ni mahse a first touch a chhiat em avangin Szczesny chuan ball a rawn laksak hman.
First half-ah Fiorentina an chungnung zawka, goal thum vel lai khung thei ni mahse goal hmaah an hriam tawk lo hle. 34mins-ah Mirallas chu dinglamah ball pek a ni, Mirallas hian ball laletin a laia awm Chiesa a pe ve leh a, Chiesa hian Juve goal-ah shoot zui deuh nghal maiin si ban a per. Hemi hnu deuh lawkah Juve-in an si phurh an sut zui a, Juve hian corner atangin Fiorentina box chhungah ball an vawrh lut, Hancko chuan a mi chan Sandro a thlahthlama, Pjanic-a’n corner atanga a ball vawrh luh chu near post lama awm Sandro chuan mawi takin goal-ah a lo tauh luta, 1-1 a ni ta. Half time hma deuh lawkin Chiesa chuan goal bar a pet per leh bawka, Fiorentina hi first half-ah an vanduai a tih theih. Goal luh belh tawh lovin first half hi 1-1 in tihtawp a ni.
Second half tan a ni a, minute sawm pawh khelh a nih hma in Fiorentina defender Pezzella chuan an lamah a khung palh ta hlauh mai; Ronaldo chuan dinglam atangin na takin Bernardeschi chu ball a pe a, hemi lo dan chah tum Pezzella chuan vanduai thlak takin an lamah a lo tilut palh a, Juventus-in 2-1 in hma an hruai a, champion lam an hnaih zel.
Darkar khat chuang hret khelh a nihin Juve lamin chance an nei a, mahse an hmang tangkai thei lova, Lafont pawh Juve hmatawng ten an tibuai viau. Hun tawp dawnah Fiorentina in Juve an nawr nasa a, an hmelma-te champion tur chu tih khawtlai an tum. Minute sawmkuanaah Simeone chuan Dabo through ball tha em em a pe a, Dabo hian hniam teah petin Szczesny chuan a ke in a lo dan sak. Injury time-ah pawh Fiorentina-in chance an la insiam zela, mahse goal khung belh thei awm tawh lovin inkhel hi 2-1 in tihtawp a ni a, Juventus an champion zui ta a ni.
Juventus hi tun hnaiah an tha fal em em a, Serie A-ah ro an rel rei tawh a, Antonio Conte-a’n a enkawl hunlai atang tawh khan an la champion char char. Thil langsar tak pakhat dang a awm a, chu chu Cristiano Ronaldo a ni. Ronaldo hian Serie A title a la ve leh ta a, ti hian England, Spain leh Italy-ah te top flight league title la vek thei hmasa ber leh awmchhun a ni a, manager lamah chuan Jose Mourinho chu England, Spain leh Italy-a champion vek thei a ni bawk a, Portuguese ve ve an ni nghe nghe. Ronaldo hian nikum khan Real Madrid chhuahsanin Juventus hi a zawm a, a tum pakhat Serie A title lak chu a hlawhtling ta phawt a ni.
