Serie A lama season 8 chhung ngawt rorel mek Juventus chuan Serie A inkhelah Bologna chu Juventus Stadium-ah an lo mikhuala, Juventus hi 2-1 in an chak.

Cristiano Ronaldo chuan Juve hi 19mins-ah hma a hruaipuia, Bologna hian darkar chanve khelh a nih hma deuhin Danilo Larangeira goal hmangin an si phurh rul mahse Miralem Pjanic second half-ah Juve chakna goal a khung.

Sawi tawh angin tunah hian Juventus hi a zawnin season 8 chhung ngawt Serie A lamah an champion tawh a, an lal an hrawta, anmahni paihthla thei an la awm meuh lo.

Tun season-ah Inter Milan-in an manager thar Antonio Conte hnuaiah bul an rawn tan tha viau a, chak lo nei lova awm rengin hma an hruaia, mahse Juventus nen inhmachhawnin, Conte hian a naute hi a club hlui lakah a tlawm puia, tunah erawh Juventus bawkin hma an hruai leh tawh.

Juventus hian khelh riat atangin point 22 an hlawhchhuak tawha, pahnihnaa awm Inter Milan chuan khelh sarih atangin point 18 an nei ve tawh bawka, Inter hi an khelh hmabakah hian chak mahse Juve hian point khatin hma an la hruai tho dawn.

Inter manager Conte hi Serie A lamah tawnhriat ngah tak a ni a, hrem an nih hnua Juventus khaiding leh tu a tih theih awm e. Conte hian Juve hi manager angin Serie A title pathum a lo lakpui tawha, Chelsea a enkawl tirh pawhin hneh takin Chelsea hi Premier League-ah a champion pui a nih kha.

Inter in Conte an laluta, a lakah beisei a sangin season bul an tan tha chho nen Inter hian Juventus an paihthla ve mai tawh dawn ni te pawhin mi tam takin an ngai hmana, mahse Juventus lam hi an chak lo duh lo a ni bera, Inter tan lehpelh chu thil awlsam a ni dawn hauh lo.

Juventus hi an champion leh a nih chuan a zawnin season kaw chung Serie A lamah ro an rel dawn tihna ni a, mahse season a la hmaa eng pawh la thleng thei ni mahse champion tura rinkai ber chu Juventus bawk hi an la ni a tih loh theih loh a ni.