10 Jan 2019 04:41

inkhel

Juventus-ah Ramsey a chiang ta

Aaron Ramsey chu Juventus nen an inbe fel tawh niin an sawi a, season tawp rualin Italy a pan ang a, Juventus ah hian kum nga chhung chu a khel phawt dawn a ni.

Kum 10 zet Arsenal-a a awm hnuah Aaron Ramsey chuan season tawp rualin khaw dang a hawi dawn a a. Emirates Stadium chhuahsanin Italy a pan ang a, Serie A champion Juventus a zawm dawn niin an sawi.

Italian journalist Fabrizio Roman chuan Ramsey leh Juventus te hi an indawr fel thawkhat tawh hle niin a sawi a, nipui transfer window inhawn hunah Ramsey hian Turin khawpui a pan ang a, kar khata £140,000 hlawhin kum nga chhung chu Juventus ah hian khel phawt turin contract a ziak dawn a ni.

Fabrizio Romano chuan, “Aaron Ramsey chu June thla hian Turin khawpuiah a lut dawn a, engkim an ti chiang tawh a. A agent pawh Italy lamah hian a kal tep a, Juventus director Paratici nen an indawr fel ang a, contract pawh an ziak nghal vek dawn a ni,” a ti.

Kum 28-a upa Wales midfielder Ramsey hi Arsenal nen contract thar chungchangah an inrem thei lo a, hei vang hian Arsenal chuan nikum kum tawp lam khan chhuah an phalsak thu hi an sawi tawh a. Season tawp rualin a contract a hman zawh dawn avangin man loin a chhuak dawn a ni.

Juventus chief Fabio Paratici chuan hmanni khan Ramsey chungchang hi a lo sawi tawh a. “Ramsey hi player duhthusam a ni chiang a, Kum eng emaw zat chu level sang berah a lo khel tawh a, tawn hriat pawh a nei tha tawh em em a ni,” a ti.

“A contract a hmang zo tawh dawn a, Arsenal in contract an ziahpui tawh dawn lo a, hei vang hian lak luh dan kan ngaihtuah ngei hmel a. Kan hnenah a rawn lut tak tak dawn nge dawn lo tih chu a la chiang mai ang. Tunah tak hi chuan Arsenal player a la ni rih a, chet buan buan theih pawh a la ni chiah lo a ni,” a ti bawk.