Real Madrid forward Cristiano Ronaldo chuan Juventus a zawm dawn ta niin an sawi a. Club te hi an inbe rem a, Juventus hian Ronaldo hi £105 million velin an lei dawn niin an sawi.
Kum 33-a upa Ronaldo hian 2009 khan kum 6 zet a lo khelhna Manchester United atangin Real Madrid hi £80 million in a zawm a, Spanish club tan hian game 438 khelin goal 451 zet a thun a, an club tana goal thun hnem ber record a siam a. 2008, 2013, 2014, 2016 leh 2017 te khan khawvela footballer tha ber chawimawina Ballon d’Or a dawng a, Golden Boot pawh vawi 3 chu a dawng bawk.
Real Madrid chuan thuchhuah siamin, “Cristiano Ronaldo chu kan club tan theihnghilh theih a ni tawh dawn lo a, a hming hi a dai ngai lo ang. Real Madrid chuan khawvela player tha ber a nihzia lantirtu leh kan club tana hun duhawm ber pawl min thlenpuitu, khawvel football tiropuitu chungah hian lawmthu kan sawi mawlh mawlh a. Real Madrid hi engtik lai pawhin Ronaldo tan hian in a ni reng ang,” tiin an tarlang.
Juventus in an lakluh hunah chuan an club record siamtu Gonzalo Higuain chu a khum chiang dawn hle a. Higuain kha an club player man to ber a ni thin a, £75.3 million in an lei a, Cristiano Ronaldo man nen khaikhin chuan a inthlau hle.
An inrem dan chuan Cristiano Ronaldo hian kar khatah £500,000 a hlawh ang a, Juventus-ah hian kum li chhung atan contract a ziak phawt dawn a. Cristiano Ronaldo leh a agent Jorge Mendes te chuan Juventus chairman Andrea Agnelli chu Greece-ah an hmu a, an pathum hian an inbe rem zui a ni.
Portugal star Ronaldo hian Real Madrid chu tun hnai season 5 chhungin UEFA Champions League title vawi 4 a lakpui a, 2014 leh 2017 final-ah te phei chuan goal a thun ve ve a. Europe lamah ro rel viau mahse tun hnaiah La Liga lamah an che fuh hleithei lo a, season liamtaah khan an hmelma lian Barcelona chu an champion a, Real hian point 17 ngawtin an umpha lo a. Real hi La Liga title chu vawi 2 chu a lakpui tho a, Spanish Cup title 2 leh FIFA Club World Cup title 3 a lakpui bawk.
Real Madrid hian an team siamthat tumin manager thar Julen Lopetegui an lalut a, La Liga title vawi 33 ngawt lo la tawh Real Madrid hi Paris Saint-Germain star Neymar nen an sawi zawm ve mek a ni.