Juve zawm turin ​Ronaldo-a’n min hmin lo – De Ligt

19th July 2019, 09:07PM

Juventus-in Ajax atanga an lakluh thar Matthijs de Ligt chuan Juventus pan chu a tum sa reng a nih thu leh Cristiano Ronaldo-a’n a hmin avanga lut a nih loh thu a sawi.

UEFA Nations League final-a Netherlands leh Portugal an intum zawhin Ronaldo leh De Ligt-te inbe lai thlalak leh video a darh nasa hle a, hemi tum hian De Ligt chuan Ronaldo hian Juventus zawm tura a sawm thu a sawi.

Kum 19 mi De Ligt hi Europe club lian ten an inchuh a ni ber a, Barcelona, Paris Saint-Germain leh Manchester United-te pawhin an dawr nasa hle a mahse Juventus hi tun kar khan a zawm fela a manah Juve hian pound maktaduai 67.8 an seng.

Nations League final an khelh zawhah Ronaldo-a’n Juventus a khel tura a sawm avangin De Ligt hian Turin a pan nia ngaih a ni a mahse a mah ngeiin hei hi thu dik lo a nih thu a sawi. De Ligt chuan, “Final a zawh khan Juventus zawm turin ka rilru ka siamfel daih tawh.

“Ronaldo-a’n min sawm kha ka lawm em em mahse a thil sawi khan eng mah danglamna a thlen lo. Juventus ka zawm chhan ber chu Italy hi defender-te langsarhna hmun a ni a, ka tan chuan hmasawnna a nih vang pawh a ni bawk,” a ti.

Sawi zelin De Ligt chuan, “Kum ruk emaw kum sarih ka nih lai khan Juventus kawr ha in thla ka la a, kha tih hunlai khan ka defender ngaihsan ber chu Fabio Canavaro a ni. Juventus hi ka ngaihsang sa hrim hrim a, a hma atanga ka club tan an ni bawk a ni,” a ti.

Copyright © inkhel.com 2024. All rights reserved.