Juventus chuan Real Madrid atangin Sami Khedira an lalut a, kum li daih contract ziak turin an inrem.

Kum 28 mi Khedira hian tun thla chhung chauh Real tan hian contract a nei tawh a, Italian club hian a thlawnin an lalut thei dawn a July ni 1 atangin a zawm ang.

German midfielder hian kum 2010 khan Stuttgart chhuahsanin Real Madrid a zawm a, Copa del Rey, La Liga leh Champions League-ahte vawikhat theuh a champion pui.

Season liamta khan a khel tlem hle a, Spanish club hi chhuahsan a tum tih a chian hnuah phei chuan a khel tawh mang lo.

Champions League finalist Juve hian Palermo striker Paulo Dybala pawh an lalut tawh a, mahse an midfielder Paul Pogba leh Andrea Pirlo-te'n an chhuahsan thung dawn niin sawi a ni.

France midfielder Paul Pogba hi club lian tam takin lakluh an duh a, mahse Juve hian hralh an phal lo tih an sawi tawh a mahse engmah a chiang thei tak tak rih lo.

Italian midfielder Pirlo hi New York City FC nen sawizawm ber an ni a, MLS club hi a zawm nge nge maithei.

Pogba leh Pirlo bakah hian Arturo Vidal dinhmun pawh a nghing niin sawi a awm bawk a, Chilean midfielder hi Manchester United chuan lakluh tumin an hel reng niin tarlan a ni.