Italian club Juventus chuan Chelsea winger Willian lakluh an tum niin an sawi.
Daily Mirror tarlan dan chuan Juventus manager Massimiliano Allergi-a'n season thar hian a zawna a vawinga nan Serie A champion nih a tum ruh hle a, hemi ti tura a hmachhawpah Willian hi a tel.
Chelsea hian Willian hi kum 2013 August thla khan Russian club Anzhi Makhachkala atangin an lei a, £32m sengin season liamta khan a khel tam a Premier League leh League Cup-ah an champion.
Juventus hian Willian bakah Oscar pawh Chelsea atang hian lakluh an duh niin sawi a awm mek bawk. London club hian an midfielder pahnihte hi hralh tumna an nei lo niin a lang a, kawlzui an la duh.
Kum 26 mi Willian hian season liamta khan The Blues tan game 49 khelin goal 4 a khung.
Corinthians atanga bul lo tanin Willian hian kum 2007 August thla khan Shakhtar Donetsk a zawm a, Ukrainian club hi Ukrainian Premier League-ah vawili champion puiin Ukrainian Cup leh Ukrainian Super Cup-ahte vawithum ve ve a champion pui a, kum 2008-2009 season khan UEFA Cup-ah an champion bawk.
Shakhtar hi kum 2013 January thla khan chhuahsanin Russian club Anzhi Makhachkala a zawm a, hemi kum August thlaah Anzhi hian an player-te chhuahtir vek an tum a Willian pawh hi a bang bik lo.
Kum 2013 August thlaah Chelsea-in an lalut a, kum nga daih contract ziahpuiin London club tan hian a game hmasa ber chu kum 2013 September ni 18 khan UEFA Champions League-a Basel an hneh tumin a khel.
Willian hian Brazil national team tan pawh game 26 khelin goal 4 a khung tawh a ni.