Premier League season kal mek chu June 17 atanga chhunzawm a ni dawn a, hemi niah hian inkhel pahnih an awm ang a, Manchester City leh Arsenal an inhmachhawn ang a, Aston Villa leh Sheffield United pawh an inhmachhawn ang.

Coronavirus vanga inkhel tihtawp lailawk a nih khan Manchester City leh Arsenal te chu inkhel tura ruahman an ni a, Aston Villa leh Sheffield United te pawh inhmachhawn tura ruahman an ni bawk a. Hri leng vanga chawlh a ngaih tak avangin heng match hnihte hi an khel hman ta lo a ni.

Inkhel tur dangte pawh a pangngaia kalpui zui a ni dawn a, match pangngai chu June 19 atanga June 21 inkarah an khel tan hlawm dawn a. Nilaini khan Premier League club hrang hrang 20 te chu an inhmukhawm a, season chhunzawm leh chungchang hi an ngaihtuah a ni.

Nilainiah khan club 20 aiawhte chuan club hrang hrangte tan a huhoa training neih tan chu an duh tlang vek a. Nilaithawhtanah chuan season chhunzawm chungchang hi an ngaihtuah a, an zavaiin an remti leh hlawm a. Tun season kal mekah Premier League match 92 khelh tur a la awm a ni.

March 13 ah khan coronavirus vangin Premier League chu tihtawp lailawk a ni a, March 9 ah khan Leicester City chuan 4-0 in Aston Villa an hneh a, hemi atang hian an inkhelh tan leh hunah ni 100 chu a liam hman dawn chiah a. Inkhel an chhunzawm leh a nih pawhin entu awm loa khelh tur a ni ang.

Season kal mekah Liverpool chuan hma an hruai fal hle a, anmahni hnaih bertu Manchester City aiin point 25 ngawtin an sang tawh a. A mawngphah lamah Bournemouth, Aston Villa leh Norwich City te chu an awm thung a ni.