02 Mar 2020 04:43

inkhel

July thlaah Fury vs Wilder 3?

Kumin July thlaah hian Tyson Fury leh Deontay Wilder te chu Las Vegas khawpuiah an inhmachhawn leh dawn niin an sawi.

Deontay Wilder chuan Tyson Fury chu a vawi thumna atan hmahhawn leh a duh thu sawiin, hemi thleng thei tura a nawr hnuah a duhthusam hi a thleng thei dawn niin an sawi a. Pathianni zanah khan Fury vs Wilder 3 chu July 18 hian Las Vegas khawpuia MGM Grand Hotel and Casino ah a awm dawn niin an sawi a ni.

Promoter Bob Arum chuan, “Zirtawp zanah khan Deontay Wilder te team hnen atangin lehkha kan dawng a, Tyson Fury nen July 18 vela inhnek leh thei turin ruahmanna kan siam ta a ni,” a ti.

“A hma khan Al Haymon, Premier Boxing Champions (PBC) leh Fox te nen kan thawkho a, anni ho hi thawhpui leh vat kan chak a, kan nghakhlel hle,” a ti bawk.

British boxer Tyson Fury chuan Las Vegas khawpuia an inhnek tumin American boxer Deontay Wilder chu round 7-naah a hneh a. Fury hi British boxer tho Anthony Joshua nen inhnek ngei tura rin a nih laiin a hmaa contract an lo ziah tawhah Wilder chuan rematch hi phut thei turin thu an lo dah tawh a, hei hi hmang tangkai a, rematch hi an neih leh theih phah dawn niin an sawi a ni.

Wilder chuan kar hmasaah khan trainer Mark Breland chu a la kawl zui zel dawn niin a sawi a. Fury nen an inhnek lai khan Mark Breland hian ring chhungah towel a vawm lut a, hei vang hian Wilder chu a thinrim hle a, Breland hi a ban zui niin thu thang a awm a. He thu thang karah hian Wilder chuan Breland chu chhawr zui a la tum thu a sawi ve thung a ni.

An inhnek hma, thla 14 kal taah khan Los Angeles khawpuiah anni pahnih hi an lo inhnek tawh a. Khami tumah khan chak zawk awm loin an inhnehtawk a, sawi pawh a hlawh hle nghe nghe a. Las Vegas khawpuia an inhnek nawn lehah hian Fury chu a chak chiang hle a, World Boxing Council heavyweight title chu Wilder hi a chhuhsak theih phah a ni.