23 May 2020 06:29

inkhel

Joshua promoter te’n Fury hmachhawn an duh lo: Warren

Frank Warren chuan Anthony Joshua promoter te chu Tyson Fury hmachhawn duh lo niin a puh a, AJ tan a pawi thei dawn nia an hriat vanga anni pahnih inhnektir duh lo niin a sawi.

Tyson Fury promoter Frank Warren bakah co-promoter Bob Arum te chuan Matchroom Boxing boss Eddie Hearn chu British boxer pahnih inhnektir a nih theih nan an lo dawr tan tawh a, an la inbe chho zel dawn a ni.

WBC champion Tyson Fury chuan a inhnek leh hunah Deontay Wilder a hmachhawn hmel hle a, an inhnek a nih chuan anni hi vawi thum an inhmachhawnna a ni tawh dawn a. Anthony Joshua pawh kumin June thlaa Kubrat Pulev nen inhnek tura tih a nih laiin coronavirus vangin an thulh leh rih a ni.

Warren chuan Tyson Fury leh Anthony Joshua te inhnektir chu a chakawm thu sawiin, mi pawhin an nghakhlel hle niin a sawi a. Chutih rualin Matchroom Boxing lampang chuan boxer huhang ngah pahnih inhnektir chu an duh tlat lo niin a sawi chhuak.

“Matchroom Boxing hian Tyson Fury leh Anthony Joshua chungchang hi an sawi ve vak vak a, a takah erawh inhnektir hi an duh tak tak lo niin ka hria a. AJ hi Tyson hmachhawn tura theh chhuah hi an duh lo bur niin ka hria,” tiin Frank Warren chuan a sawi.

“Thawm hi chu a tam a, a taka thil tih a nih loh chuan awmzia a nei chuang lo a. He khawvelah hian Tyson aia heavyweight boxer tha hi an awm lo a, rinhlelh rual lohin a chungnung ber a. Hei vang tak hian AJ te lampang chuan inhnektir hi an hreh a, an chan a chhe zawk dawn tih an hre chiang a ni,” a ti bawk.

A sawi zelnaah, “Boruak eng eng emaw hi chu a awm chho ve reng a, Bob Arum te pawh an titipui tawh tih ka hria a, chutih rualin engmah hi an sawi chiang duh miah lo a, an ngam tak tak lo ni berin ka hria a. Tyson hian AJ hi a hneh dawn chiang si a, an tan chuan a buaithlak ve dawn em bawk a ni,” a ti.