Jose Mourinho chuan kum khat deuh thaw a chawlh hnuah team a enkawl leh dawn ta a, Premier League club Tottenham Hotspur chuan an manager Mauricio Pochettino an ban a, darkar 24 pawh a ral hmain Portuguese coach Mourinho hi an ruai ve leh nghal a ni.
Manager a nih chhungin Jose Mourinho hian trophy lian 25 zet chu a la tawh a, Tottenham-ah hian 2022-23 season tawp thleng contract a ziak a. Premier League club Chelsea chu vawi hnih a enkawl tawh bakah Manchester United pawh a lo enkawl tawh avangin England rama league sang ber boruak hi chu a hmelhriat tawh hle.
Tottenham Hotspur manager a nih hmaa a zinkawng lo zawh tawh dan tlangpui han thlir ila.
Sporting Lisbon (1992-1996)
1992 - Football a khel ve thin a, a khelh tawh loh hnuah Sporting Lisbon manager Bobby Robson hnuaiah tawng lettu ni turin an la lut.
1994-96 - Sporting Lisbon assistant coach atan an ruat.
Barcelona (1996)
1996 - Bobby Robson chuan Barcelona a enkawl a, Jose Mourinho hian a zui ve zel a, King’s Cup, Super Cup leh European Cup Winners’ Cup te an lakpui.
Benfica (2000)
2000 - A vawi khatna atan coach pangngai angin a awm tan a, Benfica chuan coach atan an ruai a. Amaherawhchu, club president nen an inhmuh fuh vak loh avangin a bang leh a ni.
Porto (2003-2005)
2003 - FC Porto enkawl turin an ruai a, UEFA Cup ah an champion nghal bakah league leh cup title a lakpui nghal bawk.
2004 - Portuguese league title an la nawn leh a, UEFA Champions League-ah 3-0 in AS Monaco an hneh a, an champion bawk a ni.
Chelsea (2005-2007)
Chelsea chuan kum thum chhung atan contract an ziahpui a, kum 50 chhunga a vawi khatna atan Blues chu Premier League title a lakpui a, a hnuah pawh an title chu an humhim leh thei bawk a ni.
2007 kumah Chelsea chu Premier League-ah pahnihna an ni a, Manchester United an um pha ta lo a. UEFA Champions League semi final-ah Liverpool an hneh lo a, hetih rual hian League Cup leh FA Cup trophy te chu an la thung.
Club neitupa Roman Abramovich nen an intih thiamloh avangin September 2007 ah khan club chuan Jose Mourinho a chhuah thu an puang a ni.
Inter Milan (2008-2010)
June 2008 ah Jose Mourinho chuan Roberto Mancini a thlak a, Inter Milan a enkawl tan a. A season hmasa berah hian Serie A title a lakpui thei nghal a ni.
2010 ah khan Inter Milan chu a chet thatpui hle a, UEFA Champions League, Serie A leh Italian Cup ah te a champion pui a, European title hi kum 45 zet hnua an lak leh hmasak ber a ni.
Inhmuh thiamlohna neuh neuh avangin Inter Milan hi Jose Mourinho chuan a chhuahsan zui daih a ni.
Real Madrid (2010-2013)
May 2010 ah Real Madrid enkawl tura rawih tan a ni a, kum 4 chhung atan contract an ziahpui a. A season hmasa berah hian La Liga club lian chu King’s Cup trophy a lakpui nghal a ni.
2012 ah khan Real Madrid chuan La Liga title an la a, kum 4 chhunga league title an lak leh hmasak ber niin, Barcelona rorelna chu an titawp a. Tomislav Ivic, Ernst Happel leh Giovanni Trapattoni te hnung zuiin ram palia league title la thei palina a ni a, Portugal, England, Italy leh Spain ah te league title hi a la ta a ni.
Mourinho chuan May 2012 h khan a contract pawh seina tur a ziak a, kum hnih chhung a ziah belh a, 2016 thleng Los Blancos chu enkawl turin thuthlung a ziak.
2013 ah boruak eng emaw neuh neuh a awm chho a, Champions League semi final-ah Borussia Dortmund an hneh lo a, King’s Cup final-ah 1-2 in Atletico Madrid an hneh lo bawk a. Hemi hnu lawkah hian Real Madrid a chhuahsan tur thu an puang zui a ni.
Chelsea (2013-2015)
A vawi hnihna atan Jose Mourinho chu Chelsea nen an inzawm a, June 3, 2013 ah khan kum 4 chhung atan contract an ziahpui a. Hemi season-ah hian Chelsea chu pathumna a nihpui a, champion Manchester City aiin point 4 in an hniam zawk a ni.
2015 League Cup final-ah Tottenham Hotspur chu 2-0 in an hneh a, Stamford Bridge-a a kir leh hnua a trophy lak leh hmasak ber a ni.
May 3 ah Crystal Palace an hneh a, Premier League game 3 khelh tur la nei mah se Chelsea chu champion an ni tawh a. Jose Mourinho chu ‘Manager of the Season’ atan an thlang.
2015-16 season tan hma deuhin Mourinho chuan kum 4 chhung atan contract a ziak thar a. League Cup 4th round-ah Stoke City an hneh lo a, Premier League game 16 khelhah vawi 9 an chak lo bawk a. December 17 ah Chelsea chuan Jose Mourinho a chhuak dawn tih an puang.
Manchester United (2016-2018)
May 27, 2016 ah Manchester United chuan kum thum chhung atan Jose Mourinho chu thuthlung an ziahpui.
An lak luh atanga thla thumnaah Manchester United chu trophy a lakpui nghal a, August 7 ah Leicester City hnehin Community Shield an la a ni.
Hemi season-ah hian Mourinho kaihhruaina hnuaiah Manchester United chu Premier League-ah parukna an ni a, a hma chiah season aiin hmun khatin an tlahniam a. Ajax Amsterdam chu UEFA Europa League final-ah an hneh a, an champion thung.
2017-18 season tawpah Jose Mourinho hian Manchester United chu Premier League-ah pahnihna a nihpui a, champion Manchester City aiin point 19 ngawtin an hniam thung a ni.
December 18, 2018 ah Manchester United chuan an manager Jose Mourinho chu an ban thu an puang a, hetih lai hian Premier League-ah parukna an ni.