Jose Mourinho hun a liam tawh: Frank Leboeuf

23rd April 2019, 11:04PM

Frank Leboeuf chuan Jose Mourinho chu a vanglai hun a liam tawh nia a ngaih thu sawiin, khawvel kal mek chu a kal rem thiam tawh lo niin a sawi.

Nikum December thlaa Old Trafford atanga chhuahtir a nih hnuah Jose Mourinho hian hna chelh a nei zui tawh rih lo a. A chhuah hma khan an club chhung boruak a fuh lo hman hle a, khelmualah pawh an che fuh thei meuh tawh lo a ni ber.

Tun hnaiah Mourinho hian club enkawl a chak leh tawh thu sawiin, season thar tan leh hunah chuan eng club emaw ber chu a kaihhruai leh tawh tur thu te a sawi chhuak a ni.

Chelsea defender hlui Frank Leboeuf chuan coach ni ve si, a kalphung thlak danglam hreh deuh tan chuan tunlai khawvelah hlawhtlin theih a nih tawh loh thu a sawi a. A hun hmasa lamah hlawhtlinna hmel hmu fo tawh pawh ni se, tun ang reng a nih chuan club enkawl tur pawh a hmuh zawh loh tur thu a sawi.

Leboeuf chuan, “Ka ngaihdan dik tak sawi chuan Mourinho hi a hun a liam tawh a ni. Chelsea a enkawl hmasak tum khan ka ngaina em em a, Porto a hlawhtlinpui zia ka ngaihtuahin ka ngaisang a, a lakah beiseina pawh ka nei sang hle,” a ti.

“A hnuah kha chuan eng emaw kim lo a awm chho a, tihbo a nei chho zel a ni ber a. A hma kha chuan player te’n an ngaina a, an ngaisang em em thin kha ania, mahse a hnuah kha chuan tu vak mah khan an mil thei lo zel tawh mai a ni,” a ti bawk.

A sawi zelnaah, “Inter Milan-ah Marco Materazzi tap vel te leh thil hrang hrang kha ka la hre reng a. Manchester United player te nen lah boruak tha tak an nei thei ta miah lo bawk a, khatiang a nih takah chuan fuh lo tak kha a awm chiang tih a hriat theih a ni,” a ti.

“Club enkawl leh a duh a nih chuan Mourinho hi a inngaihtuah that viau a ngaiin ka hria a, club lian enkawl tur phei chuan tun ang ngawta a awm hi a rem dawn lo a. Paris Saint-Germain te enkawl dawn se, a kalphung a thlak nasat viau a ngai dawn tih hi a hriatthiam phawt a tul ang,” tiin a sawi bawk.

Porto, Chelsea, Inter Milan, Real Madrid leh Manchester United te lo enkawl tawh, kum 56-a upa Mourinho hi club thenkhatte leh ram thenkhatte nen an sawi zawm ve zeuh zeuh a, mahse engmah thil chiang a la awm lo thung.

Copyright © inkhel.com 2024. All rights reserved.