Victor Lindelof chuan Jose Mourinho chu ngaihawm a tih thu sawiin, Old Trafford-a hun remchang siamsaktu a nih thu a sawi chhuak.

Jose Mourinho chu nikum kum tawpah khan Manchester United chuan an ban a, kum hnih leh a chanve chhung chu United a enkawl hman a, hemi hun chhung hian trophy pathum a lakpui hman bakah Premier League-ah pahnihna te a nihpui bawk a ni.

Kum 56-a upa Mourinho hian Old Trafford a chhuahsan hnuah hna mumal a chelh leh rih lo a, hetih rual hian club hrang hrang nen an sawi zawm nual hlawm a. Team a enkawl theih tur nia an sawi thar ber chu Arsenal niin, a hun neihah chuan Sky Sports pundit angin a awm thin a ni.

Manchester United centre-back Victor Lindelof chu Portuguese coach hian 2017 kumah khan Benfica atangin £31 million ($40 million) in a lei a, hemi hnuah hian Manchester United first team-ah hmun a chang chho nasa hle a ni.

Lindelof chuan Mourinho chu ngaihawm a tih thu sawiin, management lama kal leh tawh tura a duh thu a sawi chhuak a. Eng club emaw ber enkawl leh tawh tura a duh thu sawiin, tunah pawh khawvela coach tha ber pawl a la nih reng thu a sawi.

“Jose Mourinho hi khawvela coach tha berte zinga mi a la ni reng a, football khawvela a inhman loh chuan a khawharthlak a, eng club lian tak emaw chu a enkawl leh ngei ka duhsak a ni,” tiin Lindelof chuan a sawi a ni.

“Coach tha tak a nih mai piah lamah pa tha zet mai a ni a, a lakah hian lawmthu sawi tur tam tak ka nei a. Amah hian khelmualah hun tha min siamsak a, amah vanga tun dinhmun thleng thei hi ka ni,” a ti bawk.

A sawi zelnaah, “Mourinho hi ka zah em em a, ka tana a thil lo tih tawh zawng zawng kha ka ngaihlu a, ka lawm em em vek a. Min hauh atanga min kuah thleng khan ka tan chuan lawmawm lo hi a awm lo,” a ti.