Jordan Henderson chuan coronavirus do kawnga hma latu NHS tanpuina turin a huhoa sum tuakna a huaihawt dawn.

Liverpool captain chuan NHS puala sum tuak chungchangah hian tun kar chhung khan Premier League club hrang hrang captain te chu a be kual hlawm niin an sawi a. Team hrang hrang captain te hian an player te hnenah sum tuak chungchang hi lo sawi ve turin a chah hlawm a ni.

Tun hnaiah khan British Health Secretary Matt Hancock chuan hri hlauhawm tak leng mek dona kawngah footballer te pawhin an theih ang angin hma la ve se a duh thu a sawi chhuak a. Hetiang a sawi chhuah takah chuan England midfielder Jordan Henderson chuan sum tuak chungchang hi a ngaihtuah chhuak ta niin an sawi.

National Health Service te chuan theihtawp chhuahin coronavirus dona kawngah hma an la nasa hle a. England rama league sang ber Premier League huang chhunga football player te chuan pound maktaduai tel chu an tuak theih mai a rinawm a, hetianga sum tuak hi an thlawp chho viau niin an sawi a ni.

Tunah chuan player te an la inhrilh hre chho mek a, an thiante rilru hmin tumin theihtawp an la chhuah hlawm a. Hetih rual hian NHS kaihhruaina leh sorkar lam aiawh thurawn te pawh an beisei tel bawk a, pawisa an tuak hnua a hmanna turte ruahman lawk an duh bawk a ni.

Footballer ho sum luh khawmna tur hian bank eng emaw zat chu an dawr tan tawh a, footballer te chuan bituk zat awm chuang loin an phal zat sum an thawh khawm mai dawn a. Premier League club hrang hrang 20 player te hlawh a inang lo hlawm ve hle a, hei vang hian player te remchan dan ang zela thawh mai tura beisei an ni ang.

Hetianga hma lak an rilruk hma deuh hian Manchester United player te chuan thla tharah hian an hlawh atanga 30% chu NHS pual hian thawh an tum thu an puang a. United captain Harry Maguire chu chairman Ed Woodward chuan hemi chungchang hi a sawipui a, England defender chuan senior squad hnenah thu thlen chhawngin, lungrual takin an hlawh atanga pawisa thawh hi an remti a ni.