18 May 2020 09:10

bakteaJr.

Mizo tlangval

Jordan-a Air Jordan hmasa ber an hralh to

NBA legend Michael Jordan-a’n a rookie season-a a pheikhawk bun Air Jordan, a hming a sign hnan ngei mai chu online auction-ah man to taka hralh a ni.

Jordan-a autograph chuanna Air Jordan hi Sunday khan $560,000 zeta hralh a ni a, India pawisa chuan cheng vaibelchhe li chuang (4,24,15,828 rupees) niin, hei hi Jordan-a Air Jordan pheikhawk bun hmasak ber a ni nghe nghe.

Auction buatsaihtu te hi Sotheby an ni a, anni hian nikum khan 1972 a siam Nike pheikhawk ‘Moon Shoe 1972’ chu $437,500 in an lo hralh tawha, hei hi an sneakers hralh to ber ni char charin, Air Jordan 1985 hian a rawn khuma, auction-a basketball pheikhawk hralh tawh tawh zawng zawngah a la to ber.

Jordan-a tan he pheikhawk hi kum 1985-a siam kha a ni a, signature sneaker hmasa ber niin, a tirah $100,000 atanga $150,000 vela hralh theih a nih beisei a nih laiin, beisei aia sang daiha hralh a ni.

He pheikhawk hi Jordan-a basketball pheikhawk tam zawk te angin a dinglam leh veilam size a inang lova, a veilam hi size 13 niin, a dinglam hi size 13.5 a ni.

He auction neih hun hi Air Jordan brand-in kum 35 a tlinna cham chiah a ni a, a hralhtu hi collector pakhat Jordan Geller niin, ani hi Las Vegas-a sneaker museum Shoezeum hmuchhuak tu a ni.