Kum 21 a upa Curtis Jones chuan Liverpool tan kum 5 daih contract ziak thar lehin kum 2027 thleng he hmuna cham belh tur hian inremna thuthlung a ziak.

Hetia a contract te a pawhsei takah chuan Liverpool hma huna player pawimawh tak a la nih chhoh ngei a rinawm.

Jones hi la naupang viau mah se Liverpool tan hian January 2019 khan khel ṭanin, vawi 81 ngawt a inlan tawh a, goal 8 leh assist vawi 9 a nei tawh.

Jones hian inhliam avangin tun season a la khel hnem vak lo a, club tan game 7 chauh a la inlan a, chumi zinga game 2-ah chuan inkhel bul a ṭan.

Liverpool midfielder chuan a contract pawhsei chungchang chu sawiin, “A hmasa berah chuan engtiklai pawha ka chunga rinna an nghah avangin coaching staff te chungah lawmthu ka sawi duh. Ka hlim a, ka phur bawk a, inremna ziah nawn leh hi ka tan thil harsa lo tak a ni.”

“Ka naupan lai aṭanga ka club ṭan ber a ni a, Scouser (Liverpool-a piang leh seilian) ka ni bawk, ka damchhunga ka thlawp reng tur club tan hian ka phur a, hma hunah eng nge thleng zel dawn hriat a chakawm tawh hle,” tiin a sawi.

Heti hian Liverpool tana a khel thei a lawm zia sawi lehin, “Liverpool ni lo club dangah hian khel ta ila, he club tana khelh hi ka chak ber leh tum ber a ni tho ang. Mahse hei, tunah hetah ka awm a, kum 6 mi lek ka nih aṭangin ka awmnaah hian thui tak ka paltlang tawh a, hmabak tam tak ka la nei bawk a ni,” tiin.

Jones hian Liverpool tan a inlan hnuah Premier League, FA Cup, EFL Cup leh Community Shield te a chawi tawh.

Chu mai ni loin Liverpool tan match captain ni thei naupang ber a la ni a, February 2020 khan kum 19 mi lek niin FA Cup ah Shrewsbury Town an hmachhawn ṭumin captain armband a lo hreng der tawh.

Kum 2021 khan Sheffield United nen Bramall Lane-a an intum ṭumin goal a thun a, hemi avang hian 2014-a Raheem Sterling-a’n Burnley laka goal a thun hnuah Liverpool player away goal thun thei naupang ber a ni bawk.