Mizo boxer 4, Lalrinsanga Tlau, NT Lalbiakkima, HC John Kenty Vanhlimpuia leh Laldingliana te chuan Grassroot Management kaltlangin Dubai-ah Professional bout an nei dawn. He fight hi Zonet lamah pay per view-in a en theih dawn a ni.
Mizo boxer te hian Pakistan boxer an hmachhawn vek dawn, India vs Pakistan fight a ni dawn. Tun tum hi chu an khingpui turte an tha hlawm hle, an chak ngei dawn tih a sawi lawk theih hauh loh mai.
Event hi February ni 26-ah neih a ni dawn a, Amateur boxing lama tawnhriat ngah leh sang taka invawrh Navy boxer John Kenty pawhin professional fight a luhchilh ta a, a nghahhlelhawm tawh kher mai.
John Kenty hi National-ah inlan fo tawhin International Tournament-ah pawh India tan a inlan tawh bawk a. Senior India National-ah silver pahnih la tawhin Inter Services Tournament-ah gold 2 a la tawh bawk, a professional fight hmasa berah John Kenty hian Muhammad Qahir a hmachhawn ang.
WBC Youth Champion 2021 Lalrinsanga Tlau hi Super Feather weight niin a professional record chu 6W 0L 0D a ni a, Georgian boxer Beruashivili a hneh hnuah February ni 26 hian Muhammad Sikandar Abbasi a hmachhawn ang.
NT Lalbiakkima hi IBA Interantional Champion vawi hnih lo ni tawh a ni a, ani hian kum 2018 khan World No. 1 leh Olympic Champion a lo hneh tawh a ni. NT-a hian Pakistan boxer Fida Muhammad a hmachhawn dawn, fight hmuhnawm tak a ni dawn chiang e.
Laldingliana hian professional boxing record 2W 0L 0D a nei a, ani hi LPS Profight Bantam Weight champion leh National Youth Boxing Championship-ah Bronze medalist a ni bawk.
February ni 2, 2022 (Nilaini) khan Hotel Regency-ah Dubai-a fight neih tur chungchang Press Conference neih a ni a, hneh sa tur nia ngaih boxer chah chhuah hi a hmuhnawm loh thu leh tuna Dubai-a fight tura an hmachhawn turte pawh boxer tha an ni reng em tih inkhel.com zawhna chu NT Biakkima chuan,
"A dik reng a, mipuiin man chawiin fight hmuhnawm an en chak a, chutiang a nih loh chang chuan keini tan pawh a nuam lo ve thin. Chutih laiin Mizo boxer-te level hi a lo sang ve hle tih heta tang hian a chiang.
"World Ranking-a kan hmachhawn theih chin hi tunah rih chuan kan level a lo insan hleih ve deuh a ni, chapo thil lam ni lovin, thil nihna tak a ni a. Tuna kan hmachhawn tur te erawh an tha a ni," tiin a chhang.
Grassroot Management hotupa Mujtaba Kamal chuan, "Tuna an hmachhawn turte hi Pakistan boxer te an ni a, an records atangin hemi te hi chu an tha nge tha lo tih a hriat theih loh. Chuvang chuan an fight atangin kan en a, kan fighter-te nen an inkhing tawk hle dawn a ni," tiin a sawi.
John Kenty chuan Professional boxing a luhchilh chhan sawi bawkin, "Tuna ka duhthusam la ni reng chu Olympic-a inlan a ni a, chutih laiin professional leh Amateur hi a khelh kawp theih tawh avangin kei pawh Professional lam ka luhchilh theih phah a.
"Mizo tan National-a gold lak hi thil theih a ni a, a hmasaa ka hneh loh kha chu game-ah chuan ka hneh ve tho niin ka ngai, chutih laiin gold la tur chuan hneh ve deuh hlek a ngai dawn a ni.
"Professional fight ka luhchilh chak chhan ber chu kan ngaihsan ho zawng zawng hi professional boxer an ni a, pro khelh hi ka tan a harsa em em, Grass root lamin kan coach te an lo bia a, ni hnih liamta mai chauh khan kan ti fel a, professional lam ka luhchilh ve thei ta a ni," tiin a sawi.
FIGHT CARD
Welterwight (05:30 PM)
Faizan Anwar vs Yameen Khan
Lightflyweight (05:00 PM)
NT Lalbiakkima (3-0-0, 3 KO) vs Fida Muhammad (2-2-2, 3KO)
Superfeather (04:30 PM)
Lalrinsanga Tlau (6-0-0, 3KO) vs Muhammad Sikandar Abbasi (5-4-0, 2KO)
Middleweight (04:15 PM)
John Kenty (Debut) vs Muhammad Qahir (1-0-0, 0KO)
Featherweight (03:30 PM)
Laldingliana (2-0-0, 2KO) vs TBA
Mizo Boxer-ten pay per view atanga an hlawh tur leh boxer-te thukhawchang kimchang, NT-a'n Grassroot a thawpui chhan te nen, press conference video en duh tan link hi in click dawn nia. Link : Click Here
