Jersey Number(History atanga chhui chian na)

14th April 2015, 03:04AM

Mihring nunah hian number hi thil pawimawh leh kan rilru luahtu ber pakhat anih a rinawm,kan ngaihzawng te phone number phei chu zing thawh hlim hlawl ah pawh rang takin dik thlapin kan sawi chhuak thei ang chu,kan bank account number te,kan pian ni leh kum te,pawisa kan neih zat te,kan inneih anniversary te thlengin theihnghilh lovin kan vawn reng a rinawm,number hian mihring nun ah nghet takin zung a kaih a,number tha leh number an chhe dawng te thlengin puithuna te kan nei anih hi.

Kan sawi tak ang hian football ah pawh hian kan player duh ber te leh kan club tan zawng a players te ho number chu kan chhinchhiah tham hlawm ang.Football lamah a bul tir atangin heng number, jersey hnung a chuang thin te alo pian chhuah dan leh players ten engti taka nasa in nge an number hak tur anlo ngaihpawimawh thin zia te pawh sawi zau kan tum dawn nia.

A bul atangin chhui ang aw :

Hmanlai ti mai ila,football jersey ah hian number an chhu kai ngai lova,mahse kum 1928 ah khan Sheffield Wednesday leh Arsenal inkhelh tumin jersey hnungah hian number an chhu kai hmasa ber a,khami tuma an inkhelh kha football jersey hnung a number chhut alo pian chhuah na chu ani.

Number an chhut kai pawh hian players ten an number duh zawng ang ang an ha ngai lova,2-3-5(pyramid formation) anga in rem in goalkeeper atanga in tan in goalkeeper in no 1 a ha a,defender ten no 2 leh 3,chutiang zela kal chhovin a hmatawng lamah no 11 in a tawp thin ani.

Hun alo kal zel a,formation hrang hrang te team hrang hrang in an rawn hmang chho a,ziak a dah dan chu awmlo mahse players te number pek dan tlangpui an position a zirin a awm chho a,Goalkeeper ten jersey no 1 an ha tlangpui thin a,defender ten no 2 leh no 6 in kar an ha tlangpui thin in midfielder te no 4,6,7,8,10 emaw 11 te an ha thin baw a,no 11 leh 7 te hi left leh right winger ten an ha tlangpui thin bawk ani.Striker ten no 9 emaw 10 an ha tlangpui thin in tlem a zawngin no 7,8 emaw 11 ha te pawh an awm ve leh zeuh thin bawk ani.

Kum 1965 ah khan substitute a awm theih tih dan an siam hnuah khan substitute te hian number 12 an ha tlangpui thin a,substitute atanga rawn lut hnuhnug zawkin number 14 an ha thin bawk ani.Hetih lai hian players te hian number chungchangah puithuna an nei anih chuan no 13 hi hak loh an remtihsak thin bawk.

Kum 1992 thleng khan England a FA hian players first XI a lut te chu number 1-11 thleng chauh hak an phalsak thin a,mahse FA lam hian players ten number nghet nei tura an duh takah khan kum 1992-93 season atang khan players ten number nghet an nei tan ta ani.He an dan thar hi kum 1992-93 season a League Cup final a Arsenal leh Sheffield Wed te an inkhelh tum khan an hmang tan a,1993-94 season atang khan Premier League lamah dan nghet tak siamin an hmang tan ta bawk ani.

Spain lamah ve thun chuan 1995-96 season atang khan England lama dan anlo siam tawh hi an hmang ve tan a,Germany lamah 1993-94 season ah khan hmang tan in Italy lamah 1995-96 season atang khan an hmang tan ve ta bawk ani.

Tunah hian England leh Italy lamah chuan jersey no 1-100 thleng hak an phal a,mahse Spain lamah erawh an dan a dang bik deuh a,squad a player awm zat 1-25 thleng chian number hak an phal a,goalkeeper in jersey no 1,13 emaw 25 an hak kher a ngai a,reserve team atanga a rawn khel an awm anih chuan number 26 atanga 50 thleng hak an phalsak bawk ani.

Number lar “No 10” lo lar chhuah tanna:

Pele leh no 10:

Khawvela football player piang tawh zinga a la tha ber a an thlan Pele an number 10 a hak tan dan kha a mak angreng khawp mai,kum 1958 World Cup dawn ah khan Brazil Football Confederation khan Brazil team squad FIFA a an theh luh khan players te number anlo submit tel theihnghilh tlat pek a,FIFA lamin an duh dan dan in Brazil players te hi number anlo pe ta theuh hlawm a,No 3 kha Brazil goalkeeper Gilmar an chang in Garrincha an no 7 a chang a,Zagallo an no 11 a chang bawk ani.Hetih lai hian Pele vet hung kha Jersey no 10 anlo pe ve bawk a,he World Cup 1958 kum a neih ah hian Pele hi che tha em em in game 4 ah goal 6 thun in “Young Player Of The Tournament” lawmman a dawng hial a,he number hi a vanneih chhoh pui a rin avangin number dang a ha tawh ngai lo ani.

Maradona lam ve thung..No 10 jersey number ropui atangin jersey number anchhe dawng??

World Cup 1974,78,82 chhung khan Argentina team khan players te number hi alphabetical order in an rem a,hming bul in tan na word a alphabet “ abc” a hmasa ber in no 1 chang in "z" lam hnaih ber in number hnuhnungber an chang mai thin ani.

Kum 1986 World Cup ah pawh khan an dan ngai bawk hi Argentina FA hian hmang leh in mahse hemi tum hian Maradona hian number 10 hi hak ngei a duh avangin amah bik hak tur number 10 hi an khawih danglamsak ve lova,Mardona mai bakah hian Argentina captain Passarella leh an striker Valdano te pawh khan an jersey number ngai hak leh duh in number 6 bawk Passarella khan ha leh in Valdano khan jersey number 11 a ha nawn leh bawk ani.

Argentina ah hian Maradona avang khan a jersey number 10 kha a lar hle a,Argentina ram tan a khel number 10 ha pha ngat kha chu Maradona nen khaikhin an ni thin bawk a,1998 World Cup ah pawh khan Ortega khan he jersey no 10 hi Argentina tan a a khelh khan a ha a,beisei a pha lo hle a,Argenina FA lam chuan Argentina player tha ten jersey no 10 an hak hian Maradona nen khaikhinna a tam thin em avangin player tha te ah pressure tha lo nasa tak a awm thin a,players ten an chhiatpui thin tiin he number hi September 2001 khan Argentina Football hotute chuan lungrual takin he jersey number 10 hi Maradona chawimawina ni pah fawm in chawlh tir tawh mai rem ti in thu tlukna an siam ta ani.

FIFA World Cup 2002 khelh anih dawn ah khan Argentina hian an squad payers 23 awm na FIFA lamah an thehlut ta a,mahse number 1-24 zingah hian number 10 hi telh ani ve lova,FIFA lam chuan dan khauh tak(Point 4,Article 26) anlo siam tawh avang khan Argentina team ah hian number chuang bik a awm a rem ta lova,Ortega bawk khan jersey number 10 kha a ha leh ta ani.

Tunah Maradona tluk hiala tha a an sawi Messi hian Maradona number hlui hi a chhawm ve leh ta bawk a,mahse Messi hi Barcelona ah khel ropui thei viau mahse Argentina tan a khelh hian beisei a phalo thin em em a,Argentina tan a number ropui ni thin “no 10” hi Argentina tan a anchhe dawn number ani ta mai em ni tih ngaihdan te pawh a awm thei awm e..

written by : Zaua NicoGaitan

Copyright © inkhel.com 2024. All rights reserved.