Asian Games atanga Japanese basketballer pali an thawn haw te chu an chungthu an ngaihtuah a, kum khat chhung inkhel thei lo tura hrem an ni.

August 20 khan Indonesia rama Asian Games neih mek atangin Yuya Nagayoshi, Takuya Hashimoto, Takuma Sato leh Keita Imamura te chu Jakarta khawpuiah nawhchizuar an dawr a ni tih an hria a, hei vang hian an ram lamah thawn haw nghal an ni.

Japan squad-ah hian player pali an thawn haw hnuah mi pariat an la awm a, anni hi an ram aiawhin an la inkhelh chhunzawm a, Philippines chu 113-80 in an hneh ta lo a, Indonesia nen pasarihna nih inchuhin an inkhel dawn a ni.

Japan Basketball Association chuan player pali an thawn haw te chungthu hi an ngaihtuah zui a, an hotu ber Yuko Mitsuya chuan Tokyo khawpuia chanchinthar lakhawmtute hmaah hremna an lek kawh tur chungchang hi a puang a ni.

Yuko Mitsuya chuan, “Japan ram aiawha feh chhuahte’n an mawhphurhna an hriat chian ang hian anni khan an hre ve lo a. Invawng tur an ni tih an theihnghilh a, Japanese player awm dan tur angin an awm lo a ni,” a ti.

Player an hrem pali te chuan Japan ram kawr ha chungin nawhchizuar hi an dawr a, hetiang ho awmna hmunpuiah ei leh in an tih hnuah hmeichhia hi an dawr ta a. Chanchinbu lampangah heng player te thlalak hi a rawn lang ta si a, hei vang hian thuneitu lampang chuan player te hi an thawn haw ta vat a ni.

Mitsuya chuan, “Tuna kan buaina hi a zahthlakin a atthlak hle mai a, eng ang pawhin hma la mah ila thudik chu kan thlak danglam thei dawn chuang lo a. He thil thleng hi nakin zela kan inzirna atan hmang thiam hlauh ila a tha khawp ang,” a ti.