Asian Games 2018 a tel Japanese basketball player pali te chu an chak hnuah hotute chuan an ram lamah an thawn haw.

Japan hian group game vawi khat an khel tawh a, Qatar chu 82-71 in Nilaithawhtan khan an hneh a. Hemi hnuah an team boruak a ni ta niaih mai a, player pali te chuan hotel-ah hmeichhia an riahpui avangin an hotupa chuan an pali hian Japan ramah a hawtir a ni.

An hotupa Yasuhiro Yamashita chuan chanchinthar lakhawmtute kawmin, heng player palite hi zanriah an kilpui a, zu an inpui bawk a, a hnuah an hotel-ah an hruai a, an riahpui zui niin a sawi a. Mipa pali te hi an thawmhnaw atangin Japanese player an ni tih a hriat nghal a, nawhchizuar awmna hmuna an tal kual avang chuan Jakarta an pan chhan an tih chhunzawm theih dawn loh phah ta a ni.

Japanese Olympic official te chuan chanchinbu lama player an thawn haw pali te thlalak an hmuh hnuah chauh he thil thleng hi an hriat ve thu an sawi a. JOC chuan heng player pali te hi Takuya Hashimoto, Keita Imamura, Yuya Nagayoshi leh Takuma Sato te an nih thu an sawi.

JOC in thuchhuah an siamah chuan heng player pali te hian team hming an tihchhiat em avanga an ram lama thawn haw an nih thu an tarlang a, an haw na senso zawng zawng pawh player te hian an intum chawp thu an tarlang bawk.

An thuchhuahah chuan, “Team inkaihhruaina dan chu chiang takin an bawhchhia a, hei vang hian hrem ngei an ngai a. Midangte entawn tlaka an nun uluk tur an nih laia hetianga an awm avang hian thawn haw mai kha a tha berin kan hria a ni,” an ti.

Japanese basketball player dang pariat an la awm a, anni hian Asian Games 2018 chu an dai chho zel dawn a. Nilaini hian Hong Kong an hmachhawn leh dawn a ni.