Kum 2023 January transfer chu a inhawng leh tawh a, hemi chhunga Manchester City chanchinthar neih hnaivai deuhte han thlir ho thuak thuak ila.
Perrone an la lut thei tep
Man City hian Argentina U20 international Maximo Perrone chu Etihad lamah an hruai lut thei tep. Perrone hian Agentina tan Sudamericano Sub20 khel turin a zinchhuak mek a, hemi a khelh zawh hnu hian chuan Man City hi a zawm thei tawh ang.
Kum 20 a upa defensive-midfielder hi Argentina club Velez Sarsfield tan nikum chhung khan a khel a, Premier League club hrang hrangah duhtu a nei nual. Sarsfield tan hian nikum chhung khan Argentine Primera Division lamah match 22 khelin goal hnih a thun a, Libertadores lamah pawh match 10 khelin goal khat leh assist vawi hnih a nei bawk.
Player hma hun nei eng tak a nih avangin mi tam takin Man City first-team tan a inlan theih nghal mai an ring a. A manah hian City hian 6.5 million pound an pe a ni.
Lewis contract thar zawrh an tum
Manchester City hian an right-back la naupang tak Rico Lewis chu contract thar zawrh an tum hnaivai niin Daily Mail chuan a tarlang.
Kum 18 a upa Lewis hian tun season atangin Pep Guardiola hnuaiah Manchester City first team tan a khel tan a, World Cup zawha City game khelh tawh vawi thumah inkhel bul a tan tawh nghe nghe.
England U19 international player hi Man City academy chhuak niin, tun season atangin Man City senior team tan hian a khel tan a. Premier League lamah vawi 6 inlan tawhin, EFL Cup-ah vawi 2 a inlan tawh bawk a. Hei mai bakah hian Champions League lamah pawh vawi 2 inlan ve tawhin, assist vawi khat a nei nghe nghe a ni.
Leao lei nan Grealish an tawktar
Manchester City chuan AC Milan atangin Rafael Leao lei nan an winger/attacking-midfielder neih sa Jack Grealish chu pek tel an inhuam.
He Portugal winger hi Chelsea leh Arsenal te pawhin lei an tum ve bawk a, anni hmakhalh hian City hian Etihad lama hruai luh ngei tumin an club chanchina player man to ber Grealish hi pek tel an inhuam thu Calciomercato chuan a tarlang.
Nimahsela, Milan hian inthleng an remti ang em tih erawh a la hriat loh a, an remtih loh chhan tur chu Grealish-a kum chungchangah leh kartina a hlawh £300,000 chu an pek ve theih kher a rinawm loh vangin a ni.