01 Feb 2019 05:28

inkhel

January thlaah Premier League sum che vel a tlem

January thlaa Premier League transfer window chu an khar ta a, kumin thlasik bazarah hian transfer lian tak sawi tur a awm lo hle a, kum dang aiin pawisa pawh an hmang tlem hle a ni.

Kum tin hian transfer window inhawn laia sum hman hi a pung chho tial tial a, kumin January thlaah erawh sum leng vel a tlem hle a, 2012 hnua a vawi khatna atan sum hman hi pung loin a tlahniam ve tlat a ni.

Nikum January transfer window inhawn lai khan player lei nan hian Premier League club te chuan £430 million vel zet an hmang a, hetiang taka sum an hman hnem chhan pakhat chu £75 million zeta Virgil van Dijk an leina leh £50 million a Aymeric Laporte an leina te kha a tel vang a ni. Kumin January thlaah erawh player leina atan hian £180 million vel chauh an hmang thung a ni.

Kumin January thlaah chuan transfer lian deuh sawi tur a awm lutuk lo a, tlema a lian ve pawlah pawh player te chuan Premier League an chhuahsan hlawm a. Brahim Diaz chuan Manchester City chhuahsanin Real Madrid chu £15.5 million in a zawm a, Mousa Dembele chuan Tottenham Hotspur atangin Guangzhou R&F chu £11 million in a zawm bawk a. Schalke chuan £9.6 million in Rabbi Matondo chu Manchester City atangin an lei bawk a ni.

Deloitte hnuaia Sports Business Group director Tim Bridge chuan, “Season laihawl kan thleng a, hun pawimawh tak mai a inher chhuak a tih theih a. Hetih lai hian Premier League club te chuan January thlaa transfer window inhawn chhung khan sum an hman tlem hle a, kum dangte nen khaikhin chuan pawisa che vel hi tlem tak a ni,” a ti.

2011 khan January thlaa sum hman chu £225 million niin, a kum lehah £60 million ah a tlahniam a. January 2013 khan sum che vel chu £120 million ah a chho leh dawrh a, 2014 khn £130 million niin, 2015 ah pawh a hma kuma an hman zat chiah £130 million a ni leh bawk a. Hemi hnu season thumah chuan January thlaa an sum hman hi £175 million, £215 million leh £430 million ah te a kai chho a ni.

Kumin January thlaa sum hman zat £180 million a nih takah chuan 2018-19 season chhunga Premier League club te sum hman zawng zawng chu £1.4 billion zet a tling niin an chhut a. Heti a nih chuan sum hman hnem ber dawttu a ni thei chiah a, 2017-18 season kha sum hman nasat ber tum niin, £1.9 billion zet an hmang a ni.

Deloitte chuan January thla bika pawisa hman zawng zawng atanga 43% chu Big Six te sum che vel a nih thu an sawi a, mahse nikum January thla ai chuan hei pawh hi a hniam zawk daih a, nikum kha chuan Big Six te sum hman chu 62% a ni.

Premier League mawng lam club parukte sum hman pawh nikum January ai chuan a hniam zawk daih a, nikum khan a hnuai lam club parukte sum hman chu £70 million a ni a, kuminah chuan £20 million chauh an hmang a ni.