Olivier Giroud chuan January thlaah Chelsea chu a chhuahsan thut thei nia sawiin, Stamford Bridge-a la awm zui zel a, first team-a hmun chan tuma theihtawp chhuah chu a la duh thu a sawi.
French striker Olivier Giroud chuan tun hnaiah khelhna hmun a chan tam loh em avangin a lawm loh thu a lo sawi chhuak tawh a. Chelsea manager Frank Lampard chu sawiselna a neih loh thu a sawi rualin, khelhna hmun a chang tam lo erawh thil lawmawm tak a nih loh thu a sawi a ni.
Giroud hian tun season chhungin Premier League match thum chiah a la khel a, hengah hian vawi khat chu bul a tan ve a. Lampard mai bakah a hmaa an manager Maurizio Sarri hnuaiah pawh khan khelhna hmun hi a chang tam lo hle.
Kum 33-a upa Giroud chuan a khelh tam loh avang hian lawm chiah lo mah se chhuah erawh a tum kher loh thu a sawi a. Chelsea chu a ngaihpawimawh ber a la nih reng thu sawiin, first team-a tel thei tura beihpui thlak chu a la inhuam reng thu a sawi a ni.
“Chelsea first team-ah hian hmun chang thei turin beihpui thlak ka inhuam a, ka tum bawk a. Coach pawhin ka thil tum hi a hria a, January thlaah thutlukna fumfe tak kan siam ngei ang,” tiin Giroud chuan a sawi.
“Chelsea chhuahsan hi ka duh kher lo a, la chhuah loh hi ka duh dan chu a ni chiang mai a. Amaherawhchu, duh thlan ngai a nih chuan thutlukna eng emaw tak chu siam a ngai thut maithei,” a ti bawk.
A sawi zelnaah, “Ka la upa em em lo a, kum 33 chauh ka la ni a, ka hmaah hun duhawm tak a la hman nual theih a. Ka ke ka la hmang tha thei a, nunphung pangngai ka la zawm thei a, ka taksa pawh a la fit tha bawk a. Nuam ti taka hun hman ka la duh zel a, a tam thei ang ber inkhelh hi ka duh ber chu a ni,” a ti.
“Tunah pawh hian Chelsea aia ngaihpawimawh hi ka la nei lo a, hetih rual hian Arsenal ka chhuahsan dawna min tih ang deuha min nawr lui a nih chuan thutlukna ka siam ang a, hmun dang ka pan mai chu a ngai ang,” tiin a sawi.
Thawhtanniah khan Giroud chuan France goal neih chhun a thun a, substitute bench atangin a lut a, Wissam Ben Yedder chu a thlak a. Khelmuala a luh atanga minute 4 lekah goal hi a thun nghal a ni.
Giroud hian ram tan goal 38 a thun tling chiah a, he goal hi a tan a pawimawh zual em em a. Ram tana khelh zui zel theihna pawimawh tak a nih rualin club lamah pawh boruak tha zawk neih theihna hun tha a ni tel bawk a ni.