Ole Gunnar Solskjaer chuan player thar lei tum pawh ni se January thlaah chuan player lei a harsat thu a sawi.

Manchester United manager Ole Gunnar Solskjaer chuan Romelu Lukaku leh Alexis Sanchez te chu a chhuahtir a, an hmun ruak luah tur hi player dang a la thar hran lo a. A remchang hmasa berah mi thar chu lak ngei a duh a, kum thar January thlaa transfer window inhawn hunah chuan beiseina a neih san loh thu a sawi a ni.

Solskjaer chuan, “Player kan lak thar dawn hian hun rei tak chhung atan ruahmanna kan nei tlangpui a, kum thar January thlaah pawh player thar pakhat emaw, pahnih emaw chu kan la maithei,” a ti.

“Nipui lai transfer window inhawng hi keini chuan kan nghahfak ber a ni thin a, January thlaah chuan player lei vel hi duh aiin a harsa mah mah thin a. Nipui transfer window inhawn lai hian player lei leh hralh vel pawh a nuam zawk daih,” a ti bawk.

United chu Europa League Group L hmahruaitu an ni mek a, Norwegian manager chuan a player la naupang ve tak takte chu a rin tawk thu sawiin, player senior zawk inhliamte aia khel turin an tha tawk niin a sawi.

“Player la naupang ve deuh zawkte tha taka an rawn khel thin kan hmu ve fo tawh a. Mason Greenwood chuan chakna goal a thun ve tawh a, Brandon Williams pawh Belgrade khawpuiah a che tha viau bawk a ni,” a ti.

A sawi zelnaah, “Player hrang hrangte chu khelhna hun kan siamsak ve fo thin a, player pangngai 12-13 vel khelhtir tlut tlut chu a dik lo a, an inkhelh chhawk ve a ngai thin a. Hetianga an khelh kual hian tlema la naupang ve deuhte pawh an rawn chet that ve theih phah thin,” a ti.

Tun dinhmunah Manchester United chu Premier League game 11 khelh tawhah 10-na an ni mek a, Solskjaer chuan inhliam vanga an chhawr theih rih loh midfielder Paul Pogba leh defender pahnih Luke Shaw leh Eric Bailly te chu an chhawr theih hunah chuan an dinhmun pawh a ziaawm chho sawt thei dawn niin a sawi a ni.