Duh angin Tottenham chu tun season-ah che tha lo mahse an manager Mauricio Pochettino chuan nakkum thlaksik bazar hunah an bazar a rin loh thu a sawia, a player neih sa te chu a rintawk thu a sawi bawk.

Thla hmasa khan Tottenham hi Carabao Cup atangin League Two club Colchester United chuan an pet tla a, he inkhel zawhah Pochettino chuan January thlaah an dinhmun siam thatna hun an neih tur thu sawi mahse a rilru a thlak niin a lang.

Tottenham hi tunah hian an game hnuhnung pangaah vawi li an chak lo tawh a, Bayern Munich leh Brighton lakah te mualphothlak tak takin an chak lo nghe nghe.

Pochettino chuan January thlaa an bazar dawn leh bazar dawn loh zawhna chhangin, “Kan bazar ka ring lem lo; kan player neihsa te ah hian rinna ka nghat a, anni hi ka ring tawk a ni. Midang ngaihdan hi ka palzam ngai lova, mi thenkhat chuan in thuahfai kan ngai pawh an ti maithei; mahse ka thu chu nise tuna ka player neihsaah hian ka lung a awi a, a chhan chu an tha tawk a ni.

“An rilru puthmang dik lo lai tlem awm hi tih dik mai a ngai a, player tha kan kawl a, title la tura khawpa bei thei turin kan tha tawk a ni,” a ti.