21 Nov 2020 08:59

bakteaJr.

Mizo tlangval

​January-ah kan bazar dawn em ka hre lo: Klopp

Kan hriat vek tawh angin Liverpool hian player inhliam an ngah hle a, a tam zawk te chu dam leh thuai tura beisei ni mahse, an centre-back pawimawh pahnih Virgil van Dijk leh Joe Gomez te erawh tun season-ah an inkhel leh thei dawn em a sawi theih lova, an theih pawhin season tawp lamah bak a nih hmel loh.

Liverpool hi inthawm that an ngai hle in a langa, January thlaa bazar a inhawn hunah pawh centre-back thar an lei ngei rinawm viau mahse, an manager Jurgen Klopp chuan an bazar dawn leh bazar dawn loh a hre lova, an bazar lo a nih pawhin, a player neih sa hmanga an tlingtlak theih a rin thu a sawi.

January thlaa an bazar dawn leh bazar dawn loh chungchanga zawhna chhangin Klopp chuan, “January-ah kan bazar thei dawn em ka hre lova, January thlaa hian kan bazar duh em pawh ka hre lova, kan ngaihchan mai a ngai dawn a nih hmel.

“Tuna kan dinhmun chu kan hre tlang veka, dinhmun khaikhin hi duh lo viau mah ila, kum 2008-ah Borussia Dortmund ka enkawl tirh khan, ka centre-back pahnih te kha kum 19 an ni a, khami kum thlasik khan kum 20 an tlinga, Mats Hummels leh Neven Subotic te niin, an pahnih kha kan hmang tluan zak a ni.

“Hetah pawh player naupang kan nei tha a, an la naupanga, kum 18,19,23 an ni a, player tawnhriat ngah zawkte pawh kan nei a, tu pawh hian chance an nei vek. Chance a awm tih an hria a, a inpeih tih pawh lantir an chak zek zek.

“Midfielder pawh kan nei a, tunah chuan nei rih lo mah ila, kar hnih hnu velah kan nei dawna, defensive zawka khel thei te pawh kan nei, chuvang chuan tunah chuan kan buai rih lo. Ka player neihsa te hmang hian kan tlingtla thei ang tih hi ka ring tlat a ni,” a ti.