Jamshedpur FC-ah Mizo player

30th November 2018, 07:11PM

Indian Super League (ISL) club Jamshedpur FC chuan ISL club ATK atangin mizo midfielder Malsawmzuala an lakluh thu an puanga, Sawmtea tiha hriatlar hi jersey no.8 pek a ni.

Jharkhand club chuan kum 21 mi Malsawmzuala hi loan-in Kolkata club ATK atangin an laluta, kum 2018-2019 season-a ISL game la awmah Mizoram chhulchhuak player hi Jamshedpur tan a khel dawn.

Malsawmzuala hian Chanmari FC atangin a career bul a tana, kum 2015 khan Bangaluru FC a zawma, Bangaluru player khel rim pawl a ni chho nghal. Bangaluru tan hian Malsawmzuala hian I-League leh AFC Cup-ahte a khel tha hle a, vawi 15 inlanin goal khat a khung.

Kum 2016 khan loan-in Delhi Dynamos FC zawm leh, a season khatnaah Delhi tan vawi li a inlana FC Pune lakah goal pawimawh a khung nghe nghe. Hemi hnu hian Mizo rawlthar hian ATK zawmin, duh angin thil a kaltluang lova, Steve Coppell-a hnuaiah a khel tlem hle.

India U19 player hlui niin Malzawmzuala hi India senior team tana khel tura koh a ni tawh bawk. Tunlai Indian footballer rawlthar zingah kum 21 mi hi beiseiawm ber zinga mi a ni a, India tan pawh a la tangkai chho zel tura beisei a ni.

Jamshedpur FC head coach Cesar Ferrando chuan, “Malsawmzuala hi kan khelh dan mil taka khel thin midfielder a ni a, hun eng emaw chen kalta atang khan kan lo enthla tawh a, kan lalut thei hi kan lawm hle. Team bulah training a zawm tawh a, kan tan a inlan theih thuai ka beisei a ni,” a ti.

Copyright © inkhel.com 2024. All rights reserved.