Australia tana goal thun hnem ber Tim Cahill chuan Indian Super League a rawn luhchilh dawn hnai niin an sawi a, Cahill hian 2018-19 season atan Jamshedpur FC a zawm dawn niin an sawi.

Australia rama media thenkhat chuan Socceroos star thin Tim Cahill hi Jamshedpur FC nen an inbe mek niin an tarlang a. England Second Division club MIlwall lama hun hmang mek Cahill hian Jamshedpur FC lamah mawhphurhna thar a nei maithei a, thutlukna chu ni hnih hnu velah a hriat theih dawn niin an sawi a ni.

Kum 38-a upa Cahill hian Australia tan game 107 khelin goal 50 a thun tling a, Russia rama 2018 FIFA World Cup khelh zawh khan ram tana khelh a tum tawh loh thu a puang zui a. Socceroos chu group stage-ah vawi khat mah an chak lo a, knockout stage an thleng ta lo a ni.

Cahill hian Russia ramah bul a tan ngai lo a, France leh Denmark nen an inkhelh tumin coach Bert van Marwijk chuan a khelhtir lo a, mahse 0-2 a Peru an hneh loh tumin Tomi Juric a thlak a, ram tan vawi 107 chu a khelh tlin theih phah a ni.

Tim Cahill hian Indian Super League a zawm thei a nih chuan Down Under atanga player lar thin lut pahnihna a ni dawn a. 2013-14 a ISL an tan tirh khan Alessandro Del Piero chuan Delhi Dynamos a lo zawm tawh bawk a ni.

Andrew Barisic (Kerala Blasters) leh Tolgay Ozbey (Goa FC) te chu Australian player awm mek an ni a, Bengaluru FC pawhin Erik Paartalu an nei ve bawk.

Melbourne City striker hlui Cahill hian kum riat zet chu Everton ah hun a hmang a, Premier League goal thun thei pawl tak a ni chho a. Hemi hnu hian Chinese club Shanghai Shenhua leh Hangzhou Greentown ah te a khel a, Major League Soccer club New York Red Bulls ah pawh a khel tawh bawk a ni.