Wales manager Ryan Giggs chuan Manchester United player thar Daniel James –a lakah player-te an foul nasa mah mahin a hria a, James chuan referee-te venhimna a mamawh tih a sawi.

James hi United game hnuhnung bera Wolves nen an inkhelh tumin Joao Moutinho chuan ball chhuhsak a tum a, James hi tlu in, referee chuan a tlu derah a ngaih saka, yellow card pek a ni.

Giggs chuan, “Daniel James hi a tlan chak em avangin a nih ang aiin thil a lang ‘serious’ thin a, kan tlan chak tawh lutuk kan hmaa thil thleng tura kan rinlawk dana chet chhuah a ngai a thina, tlu der kan an phah thin. Player dangte hi Daniel-a lakah an foul nasa hle a, referee-te hian an venhim that a ngai a ni,” a ti.

Sawi zelin, “Attacking player nih chuan midang kan lakah an foul nasa bik dawn chianga, chuvang chuan Daniel-a lakah pawh an foul nasa. Referee-te tan pawh thil awlsam a ni lova, mahse kan hmaah min rawn foul dawn tih kan hmuh lawk chuan chumi a zira chet chhuah chu a ngai thina, a nih ang aiin a lang ‘serious’ ta thin a ni,” a ti bawk.

Daniel James hi Welsh a ni a, tun ah Manchester United-ah United player hlui Ole Gunnar Solskjaer chuan a enkawl meka, a ram lamah pawh Wales manager Giggs hi United player hlui bawk a ni.

Kum 21 mi chauh la ni mahse James hi United tan a pawimawh chho viau dawn niin a langa, a game hmasa berah Chelsea lakah goal a khung nghala, tun season-a United game hnihnaah starting XI a chang chhunzawm bawk a ni.