10 Oct 2020 05:21

inkhel

James-a’n Lakers player te a fuih

LeBron James chuan NBA Finals khelh mekah Lakers player te chu an hmabakah theihtawp chhuah turin a fuih.

Tukina an inkhelhin Miami Heat chuan Los Angeles Lakers chu 111-108 in an hneh a, best-of-seven series-ah Lakers hian 3-2 in hma an la hruai a. Heat hian kum 10 chhunga a vawi khatna atan NBA title lak ngei an tum hle a, Lakers hian title an hnaih tawh zawk a ni.

Los Angeles Lakers hian title la turin vawi khat chak chiah an mamawh tawh a, hei vang hian an inkhelh leh hunah pawh LeBron James chuan player te chu an inkhel boruaka cheng tura a duh thu sawiin, theihtawp chhuah ngei turin a fuih a ni.

James chuan, “Inkhelh reng rengin tih mai mai loh hi a tha ber a, eng team pawh hmachhawn ila, theihtawp kan chhuah zel a tul a. Final a ni emaw, first round a ni emaw, inthlahdah hauh loh tur a ni,” a ti.

“Quarter tinah tan kan lak dan a pangngai vek tur a ni a, kan inkhel boruakah khan keimahni kha kan inhnimphum a pawimawh ber a. Inkhelh laia thil dang kan rilrua kan dah chuan result tha kan nei thei ngai lo ang,” a ti bawk.

A sawi zelnaah, “Tuna kan team hmachhawn mekte pawh hi an hlauhawm hle a, tihsual kan neih zeuh hi kan tuar zel a, a pawi thei viau zel a. Hei vang tak hian fimkhur tak si, theihtawp chhuah chung siin hma kan lak a ngai a ni,” a ti.

Orlando, Florida-ah Lakers chuan champion theih tawh an inbeisei viau laiin Heat chu a chak zawk an ni leh a, game dang an la khelh zel a ngaih phah a. Chak lo zawk ni mah se LeBron James chuan he inkhelah hian point 40 zet chu a thun tho a ni.

Miami Heat hian NBA team pakhat chauhin an la tih theih chu tih ve theih an tum dawn a, 1-3 a hnufual zawk nih tawh hnua champion thei zawk nih an tum dawn a. 2016 ah khan Cleveland Cavaliers chu 1-3 in an hnufual hmasa a, Golden State Warriors chu an lehthal leh thei a ni.