03 Nov 2018 12:34

inkhel

​Jail-a tang tur Lord Bendtner

Arsenal striker hlui Nicklas Bendtner chuan taxi khalhtu chungah tharum a thawh a vangin ni 50 chhung jail-a tang tura a chungthu rel a ni a, pound 177 chawi tir a ni bawk.

Kum 30 mi hi Norwegian club Rosenborg tan a khel meka, a jail tan tur hian club lamah nghawng engmah a nei dawn lo tih Rosenborg hian an tarlang. Bendtner leh a ukil-te chuan he hremna hi pumpelh dan an zawng dawn a, tunah erawh ni 50 chhung jail tang tura tih a ni.

Denmark capital Copenhagen-ah Bendtner hian taxi khalhtu pakhat chu kut a thlak a; a hnek bakah a pet zui bawk. He thil hi September thla ni kuaa thleng a ni a, Bendtner hian a chuan man chungchangah an intih buai avang leh taxi khalhtu lak atanga a invenhim vanga kutthlak ta a nih thu a sawi.

Taxi khalhtu hi a khabe ruh a tliak a, lirthei a khalh laia telephone a hman avang leh seat belt a hman loh bawk avangin pound 350 chawitir a ni ve bawk.

Bendtner hian Arsenal atangin a career a tan a, hun rei ta chhung North London-a a cham hnuin kum 2014 khan Bundesliga club Wolsburg a zawma, hemi hnu hian Nottingham Forest zawm lehin kum 2017 atang khan Rosenborg tan a khel tan. Denmark tan Bendtner hi vawi 81 khel tawhin goal 30 a khung tawh bawk.