England international hlui Phil Jagielka chuan kum 41 mi niin inkhelh a chawlhsan thu a puang a, Jagielka hian a professional career-ah game 805 a khel.

Season hmasa zawh rual khan Championship club Stoke City chuan Jagielka hi an chhuah zalen a, kum chanve dawn club zawn a neih loh hnuah football a mangtha ve ta a ni.

Jagielka hian kum 23 chhung professional football a khel a, club level-ah game 765 khelin, a ram England tan kum 2008 atanga kum 2016 inkar khan game 40 a khel bawk. Jagielka hi Euro 2012 leh 2014 FIFA World Cup-ah te khan England squad-ah a awm a, Three Lions tan hian goal 3 a khung a, a club career-ah goal 40 chuang a khung bawk.

Sky Sports in an kawmnaah Jagielka hian inkhelh a chawlhsan thu hi puangin, “Miin min la duh em tih ka ngaihchan avangin ka chawlh thu ka puang lawk lova, mahse min duhtu an awm tawh lova, ka hrethiam bawk. Kum 40 chuang thleng ka inkhel thei hi ka inchhuang hle a ni,” tiin a sawi.

Jagielka hian Sheffield United-ah professional career bul a tan a, kum 2006 khan Sheffield hi Championship atangin Premier League-ah a kaipui. Kum 2007 khan pound maktaduai 4 sengin Everton an lalut a, Everton-ah hian kum 12 awmin, kum 2013 khan Everton captain atana ruat a ni.

Kum 2019-a a contract a hman zawh hnuah Jagielka hian Everton chhuahsanin Sheffield-ah a kir leh a, Bramall Lane-a kum hnih a awm hnuah kum 2021 khan Derby County tan a khel zuai a, Derby-a thla nga a awm hnuah Stoke-a kalin, Stoke hi a club hnuhnung ber a ni ta a ni.