Arsene Wenger chuan Jadon Sancho chu Arsenal a enkawl lai khan Manchester City atanga lei a tum thu a sawi.

Arsenal boss hlui Arsene Wenger chuan Emirates Stadium-a a awm lai khan Jadon Sancho chu tha a tih thin thu sawiin, Manchester City-ah khelhna hmun a chan tam ngai loh avangin lak luh a lo tum tawh tih a sawi chhuak.

England forward Jadon Sancho hian Thawhleh zana England leh Kosovo inkhelh tum khan goal hnih a thun a, an ram chu 5-3 ngawtin a chakpui a. 2017 kumah khan Manchester City chuan kar khata £35,000 hlawhtir an inhuam thuan hrilh a, heti chung hian hmun dang a pan ta a ni.

Jadon Sancho hian Manchester City a chhuahsan hnuah Borussia Dortmund chu a zawm a, tun hnaiah Bundesliga-ah chuan boruak a nei lian chho hle a. A khel hnem tial tial a, hma pawh a sawn chho nasa viau bawk a ni.

Kum 19-a upa Sancho hi Manchester United leh a club hlui Manchester City te chuan an thlithlai ngun hle a, a remchan huna lak luh atan an duh ve ve a. Hetiang karah hian Wenger chuan tunhma deuh khan Arsenal-a lak luh a lo tum tawh thu hi a sawi chhuak a ni.

Wenger chuan, “Jadon Sancho hian Manchester City-ah khan a khel tam lo hle a, ha vang khan kan hnena thlem luh kha ka tum a. Amah hi London khaw chhuak a nih bawk avangin Arsenal-ah khelhtir ngei kha ka duh hle,” a ti.

“A rualpui zingah chuan amah aia tha hi an awm vak bik lo a, a tha ber pawl a ni chiang a. Dribbling a tha si a, a che rang reuh bawk a, kawng hrang hrangah a tha viau mai a. Amahah hian footballer ropui tak takte neih ang hi a awm ve chiang a, mahni inrintawkna te a nei tha hle a ni,” a ti bawk.

French pachal Arsene Wenger hian Arsenal a enkawl lai khan tuna player lar eng emaw zat hi lak luh a lo tum tawh thu a sawi thin a. Jadon Sancho hma hian Cristiano Ronaldo, Zlatan Ibrahimovic, Kylian Mbappe bakah kum 16-a upa Lionel Messi te pawh a lo beisei tawh hlawm a ni.